پنجاب حکومت نے جمعہ کے روز تعلیمی اداروں کی بندش سے متعلق اعلان کر دیا

بارش کے بعد ماحولیاتی آلودگی میں نمایاں کمی آئی ہے جس کے باعث اب جمعے کو سکول کھلے رہیں گے، نگران وزیر اعلٰی کا اعلان

محمد علی جمعرات 30 نومبر 2023 21:51

لاہور (اردوپوائنٹ اخبارتازہ ترین۔ 30 نومبر 2023ء) پنجاب حکومت نے جمعہ کے روز تعلیمی اداروں کی بندش سے متعلق اعلان کر دیا۔ تفصیلات کے مطابق پنجاب میں اسموگ سے متعلق نگران وزیراعلیٰ محسن نقوی کی زیرصدارت اجلاس ہوا، ایئرکوالٹی انڈیکس بہتر ہونے پر پنجاب میں اسموگ پابندی ختم کردی گئی ہے۔ بارش کے بعد ماحولیاتی آلودگی میں نمایاں کمی آئی ہے، جس کے باعث اب جمعے کو سکول کھلے رہیں گے۔

نگران وزیراعلیٰ پنجاب محسن نقوی نے ایک پر جاری اپنے پیغام میں کہا کہ موسم سرما کی تعطیلات 18 دسمبر 2023 سے یکم جنوری 2024 تک ہوں گی۔ انہوں نے کہاکہ پنجاب میں ایئرکوالٹی انڈیکس بہتر ہوگیا ہے جس کے باعث پنجاب میں اسموگ پابندی ختم کردی گئی ہے۔

(جاری ہے)

مزید برآں صوبہ سندھ میں موسم سرما کی تعطیلات کا نوٹیفکیشن جاری کردیا گیا ہے۔

تفصیلات کے مطابق محکمہ تعلیم سندھ کے نوٹیفکیشن میں کہا گیا ہے کہ کراچی سمیت سندھ بھر کے تعلیمی اداروں میں 22 سے 31 دسمبر تک تعطیلات ہوں گی، موسم سرما کی تعطیلات کا اطلاق سندھ کے تمام سرکاری و نجی تعلیمی اداروں پر ہوگا، محکمے کی سالانہ اسٹیرنگ کمیٹی کے فیصلے کے تحت تعطیلات کی جارہی ہیں، کراچی سمیت سندھ بھرمیں نجی و سرکاری تعلیمی ادارے یکم جنوری سے دوبارہ کھلیں گے۔

دوسری جانب محکمہ موسمیات کا کہنا ہے رواں موسم سرما میں معمول یا معمول سے زیادہ بارشیں ہو سکتی ہیں، ملک بھر میں درجہ حرارت معمول سے زیادہ رہنے کا امکان ہے، ملک کے مغربی اور شمال مغربی علاقوں میں معمول سے زیادہ بارش متوقع ہے، بلوچستان، خیبرپختونخوا میں معمول سے زیادہ بارشوں کا امکان ہے، بالائی پنجاب اور کشمیر میں معمول سے قدرے زیادہ بارش ہوگی، جنوب مغربی بلوچستان، بالائی خیبر پختونخواہ میں معمول سے زیادہ درجہ حرارت رہنے کا امکان ہے، گلگت بلتستان میں بھی معمول سے زیادہ درجہ حرارت رہنے کی توقع ہے، رواں مہینے شمال مغربی خیبر پختونخواہ میں معمول سے قدرے زیدہ بارشیں ہوں گی جبکہ اونچے پہاڑوں پر برف باری ہوسکتی ہے۔