بلنکن کی رام اللہ میں محمود عباس سے ملاقات،غزہ میں شہریوں کے تحفظ پر زور

جمعہ 1 دسمبر 2023 21:22

واشنگٹن(اُردو پوائنٹ اخبارتازہ ترین - آن لائن۔ 01 دسمبر2023ء) امریکی محکمہ خارجہ نے کہا ہے کہ سیکرٹری انٹونی بلنکن نے اسرائیلی وزیر اعظم بنجمن نیتن یاہو پر زور دیا ہے کہ اگر لڑائی دوبارہ شروع ہوتی ہے تو جنوبی غزہ میں شہریوں کو تحفظ فراہم کیا جائے۔غیرملکی خبررساں ادارے کے مطابق محکمہ خارجہ کے ترجمان میتھیو ملر نے ایک بیان میں کہا کہ بلنکن نے نیتن یاہو کے ساتھ ملاقات کے دوران اس بات پر زور دیا کہ جنوبی پٹی میں کسی بھی فوجی کارروائی سے قبل انسانی ضروریات اور شہریوں کے تحفظ کو مدنظر رکھا جائے۔

ملر نے مزید کہا کہ بلنکن نے اسرائیل پر زور دیا کہ وہ شہریوں کو نقصان پہنچانے سے بچنے کے لیے تمام ممکنہ اقدامات کرے۔ انہوں نے مغربی کنارے میں کشیدگی کو کم کرنے کی ضرورت پر بھی زور دیا اور ساتھ ہی اسرائیل کو مغربی کنارے میں تشدد کے لیے انتہا پسند آباد کاروں کو جوابدہ ٹھہرانے کے لیے فوری اقدامات کرنے کی ضرورت پر بھی زور دیا۔

(جاری ہے)

اسرائیل کے دورے کے بعد امریکی وزیر خارجہ رام اللہ پہنچے جہاں انہوں نے فلسطینی اتھارٹی کے سربراہ محمود عباس سے ملاقات کی۔

بلنکن یروشلم میں اسرائیلی وزیراعظم سے ملاقات کے فورا بعد ایک بکتر بند گاڑی کے ذریعے فلسطینی اتھارٹی کے ہیڈ کوارٹر پہنچے۔انٹونی بلنکن نے مزید کہا کہ امریکا اپنے دفاع کے حق میں اسرائیل کی بھرپور حمایت کرتا ہے اور اس بات کو یقینی بنانے کی کوشش کرتا ہے کہ 7 اکتوبر کے واقعات دوبارہ رونما نہ ہوں۔ ان کا اشارہ سات اکتوبر کی طرف تھا جب حماس کی طرف سے جنوبی اسرائیل پر حملہ کردیا تھا۔