امن و امان کی خراب صورتحال، گورنر خیبرپختونخوا نے صوبے میں سیاسی سرگرمیوں کو مشکل قرار دے دیا

گورنر خیبر پختون خوا حاجی غلام علی نے پی ٹی آئی کے لیول پلیئنگ فیلڈ نہ ملنے کے الزامات کو مسترد کردیا الیکشن کے عمل کو مشکوک بنانا کسی کے لیے اچھا نہیں ، لیول پلیئنگ فیلڈ کے حوالے سے پی ٹی آئی کے اعتراضات درست نہیں ، انٹرویو

اتوار 3 دسمبر 2023 19:10

امن و امان کی خراب صورتحال، گورنر خیبرپختونخوا نے صوبے میں سیاسی سرگرمیوں ..

پشاور (اُردو پوائنٹ اخبارتازہ ترین - این این آئی۔ 03 دسمبر2023ء) خیبرپختونخوا کے گورنر حاجی غلام علی نے امن و امان کی مخدوش صورتحال کے باعث صوبے کے بعض علاقوں میں سیاسی سرگرمیوں کو مشکل قرار دینے کے ساتھ ساتھ پاکستان تحریک انصاف کے مختلف مقدمات میں مطلوب رہنماں کو جلسوں کی اجازت نہ دینے کا عندیہ دیدیا۔ نجی ٹی وی کو دیئے گئے انٹرویومیں گورنر حاجی غلام علی نے پی ٹی آئی کے لیول پلیئنگ فیلڈ نہ ملنے کے الزامات کو مسترد کردیا۔

انہوں نے سوال اٹھایا کہ اس وقت کالعدم تحرک طالبان پاکستان (ٹی ٹی پی) خیبرپختونخوا میں کتنی متحرک ہی ان کا کہنا تھا کہ اس میں کوئی شک نہیں کہ خیبرپختونخوا کے کچھ علاقوں میں امن و امان کی صورتحال بہتر نہیں ہے، ٹانک، ڈی آئی خان، لکی مروت، بنوں اور بلوچستان میں سیکیورٹی کی صورتحال بہتر نہیں ہے۔

(جاری ہے)

گورنر خیبر پختونخوا نے کہا کہ انتخابات پرامن ہونے چاہئیں، یہ نہیں ہونا چاہیے کہ ووٹر ووٹ ڈالنے جائے اور اپنی جان ہی کھو دے، ایک ذمہ دار عہدے پر بیٹھا ہوں، اس لیے بس اتنا ہی کہوں گا کہ صوبائی حکومت اگر محسوس کرے تو یہ معاملہ الیکشن کمیشن کے سامنے رکھے۔

حاجی غلام علی نے کہا کہ صوبے کے کچھ علاقوں میں الیکشن شاید ہوجائے لیکن سیاسی سرگرمیاں انجام دینا مشکل ہوں، ٹانک، وزیرستان، بنوں، لکی مروت مروت میں سیاسی سرگرمیاں مشکل ہوں، اس طرح کے علاقے بلوچستان میں بھی ہوں گے۔انہوںنے کہاکہ ایک ہفتے قبل کرم ایجنسی میں 15، 16 لوگ آپس کے جھگڑے میں مارے گئے، اس طرح کے واقعات تقریبا ہفتے مہینے میں ہوتے ہیں، اس پر حکومت اور ادارے بیٹھ کر کوئی فیصلہ کریں گے اور الیکشن کمیشن کو بتائیں گے۔

انہوں نے کہا کہ آپ جانتے ہیں کہ سربراہ جے یو آئی (ف)مولانا فضل الرحمن پر چار پانچ حملے ہوچکے ہیں، اس طرح کی رپورٹس ہمیں موصول نہیں ہوتیں لیکن ہوسکتا ہے اس طرح کی اطلاعات وزیر داخلہ کے پاس ہوں۔ایک سوال کے جواب میں گورنر خیبر پختونخوا نے سوال اٹھایا کہ تحریک انصاف کے جن رہنماں پر مقدمات ہیں وہ کیسے اسٹیج پر کھڑے ہوکر تقاریر کریں گی جن رہنماں پر الزامات ہیں، وہ عدالتوں میں پیش ہوں اور الزامات سے بری ہو کر آئیں۔

انہوںنے کہاکہ الیکشن کے عمل کو مشکوک بنانا کسی کے لیے اچھا نہیں ہے، لیول پلیئنگ فیلڈ کے حوالے سے پی ٹی آئی کے اعتراضات درست نہیں ہیں، حال ہی میں انہوں نے اتنے جلسے کیے ہیں، انتخابات کا شیڈول جاری ہونے سے قبل ہی لیول پلیئنگ فیلڈ پر اعتراضات کیے جا رہے ہیں۔