’متفقہ قومی معاشی منشور ہی پاکستان کو مسائل سے نکال سکتا ہے‘

مسلم لیگ ن کے صدر شہباز شریف کی ایک بار پھر چارٹر آف اکانومی کی تجویز

ساجد علی پیر 4 دسمبر 2023 11:25

’متفقہ قومی معاشی منشور ہی پاکستان کو مسائل سے نکال سکتا ہے‘

لاہور ( اُردو پوائنٹ اخبارتازہ ترین ۔ 04 دسمبر 2023ء ) پاکستان مسلم لیگ ن کے صدر شہباز شریف نے ایک مرتبہ پھر چارٹر آف اکانومی کی تجویز دیتے ہوئے کہا ہے کہ چارٹر آف اکانومی کی تجویز بطور قائد حزب اختلاف دی جس پر آج پوری قوم متفق ہوچکی ہے کیوں کہ متفقہ قومی معاشی منشور ہی پاکستان کو مسائل سے نکال سکتا ہے، انتخابات میں کامیابی ملی تو نواز شریف کی قیادت میں قومی ترقی کے معاشی منشور پر عمل کریں گے۔

اپنے ایک بیان میں انہوں نے کہا کہ ‎سیاسی و جذباتی بیانات سے نہیں پالیسی اقدامات سے معیشت بحال ہوگی، عوام مہنگائی سے نجات اور معاشی خوشحالی چاہتے ہیں، ہم روزگار مہیا کریں گے اور غربت کا خاتمہ کریں گے، بجٹ خسارا کم کرنا ہماری ترجیحات میں شامل ہے، ‎نواز شریف نے ہمیشہ پاکستان کی معیشت کو سنوارا، اگر انتخابات میں کامیابی ملی تو معاشی منشور پر عمل کریں گے، نوجوان، کسان، مزدور، محنت کش، دیہاڑی دار، بیوہ، یتیم اور کمزور طبقات کے حل پر خصوصی توجہ ہو گی۔

(جاری ہے)

سابق وزیراعظم نے کہا کہ ‎کاروبار میں آسانی لاکر سازگار معاشی ماحول پیدا کرنا ہے، ‎برآمدات میں اضافہ کرکے معاشی پائیداری یقینی بنائیں گے البتہ تاریخ گواہ ہے عوام کو مہنگائی سے نجات صرف مسلم لیگ ن دلاتی ہے، مہنگائی سے عوام کو نجات دلانے کے لئے ‎انتخابات میں حصہ لے رہے ہیں، ‎‎الیکشن جیت کر نوجوانوں کو ہنرمند جب کہ اسٹارٹ اپس کی معاونت اور سرپرستی کرکے کاروباری سرگرمیوں میں تیزی لائیں گے۔

انہوں نے کہا کہ نوجوانوں کو آئی ٹی کے شعبے کی ترقی کا مرکز و محور بنائیں گے، آئی ٹی کے فروغ سے نوجوانوں کے روزگار اور زرمبادلہ میں اضافے کے دونوں اہداف حاصل ہوں گے، سیاسی اور جذباتی بیانات سے نہیں پالیسی اقدامات سے معیشت بحال اور عوام کو مہنگائی سے نجات ملے گی، زرعی انقلاب لائیں گے، صنعت، معدنیات، آئی ٹی کے شعبوں میں مثالی ترقی ہوگی، 200 ارب روپے کے زرعی پیکج نے معاشی بہتری اور زرعی شعبے کی بحالی میں اہم کردار ادا کیا۔