بلدیہ عظمی کراچی کی کونسل کا اہم اجلاس میئر کراچی کی زیر صدارت منعقد ہوا

کراچی (اُردو پوائنٹ اخبارتازہ ترین - اے پی پی۔ 07 دسمبر2023ء) بلدیہ عظمی کراچی کی کونسل کا عام اجلاس کونسل ہال صدر دفتر بلدیہ عظمی کراچی میں میئر کراچی بیرسٹر مرتضی وہاب کی زیر صدارت منعقد ہوا۔ جمعرات کومنعقدہ اجلاس کے دوران مجموعی طور پر 13 مختلف قراردادوں کی منظوری دی گئی۔ اجلاس کے آغاز میں غزہ میں شہید ہونے والے فلسطینیوں اور کراچی کے شاپنگ مال میں لگنے والی آگ میں جاں بحق ہونے والوں کے لئے دعائے مغفرت کی گئی اور اس حوالے سے متفقہ طور پر منظور کی گئیں دو ایک جیسی قراردادوں کے ذریعے فلسطین کے نہتے عوام پر اسرائیل کی جارحیت کی شدید الفاظ میں مذمت کرتے ہوئے عالمی طاقتوں بالخصوص مسلم ممالک سے غزہ میں اسرائیلی جارحیت کے خاتمے کے لئے موثر کردار ادا کرنے کا مطالبہ کیا گیا۔

(جاری ہے)

اجلاس کے دوران محکمہ کلچر اینڈ اسپورٹس کے ماتحت کراچی میٹروپولیٹن میوزیم کے قیام کی بھی منظوری دی گئی جہاں بلدیہ عظمی کراچی کی گزشتہ 70 سال سے اب تک کے تاریخی حوالوں کو عوام کی آگاہی کے لئے محفوظ کیا جائے گا۔ ایک اور قرارداد کے تحت سٹی کونسل نے بلدیہ عظمی کراچی میں انفورسمنٹ اینڈ امپلی مینٹیشن ڈپارٹمنٹ کے قیام اور اس کے شیڈول آف اسٹیبلشمنٹ کی منظوری دی تاکہ کراچی کی بہتر، محفوظ اور حفظان صحت کی حالت کو برقرار رکھنے اور حاصل اختیارات کا استعمال کرتے ہوئے آمدنی کے اضافے کے لئے اس پر عملدرآمد کیا جاسکے۔

نئے قائم شدہ محکمے میں ڈائریکٹر (چیف انسپکٹر)اور ایڈیشنل ڈائریکٹر کی ایک ایک آسامی سمیت دیگر ملازمین شامل ہیں، مختلف محکموں سے یہ آسامیاں نئے محکمے میں منتقل کی گئی ہیں۔ اجلاس میں کثرت رائے سے منظور کی گئی دیگر قراردادوں میں سٹی کونسل نے گلستان جوہر میں جوہر چورنگی سے حبیب یونیورسٹی تک انڈر پاس کا نام شہدا فلسطین سے منسوب کرنے کی منظوری، بلدیہ عظمی کراچی کی کونسل کی 35 کمیٹیوں اور ان کی اراکین کی تعداد کے تعین، باغ جناح(سابقہ الہ دین پارک)اور اس سے متصل 16 ایکڑ اراضی ٹرانس کراچی (بی آر ٹی)ریڈ لائن پروجیکٹ کے بس ڈپو کے لئے صوبائی کابینہ کی سمری کی روشنی میں استعمال کرنے کی اجازت، بی آر ٹی کے تحت صفورا چورنگی سے ایم اے جناح روڈ تک ریڈ لائن منصوبہ اور ایم اے جناح روڈ سے گرین لائن توسیع منصوبہ کے ترقیاتی کام نہ ہونے کی وجہ سے عوامی مشکلات کو مدنظر رکھتے ہوئے وفاقی حکومت سے فوری اقدامات عمل میں لانے کی سفارش، سندھ لوکل گورنمنٹ ایکٹ 2013 (ترمیم شدہ 2023 )کے تحت محکمہ اینٹی انکروچمنٹ بلدیہ عظمی کراچی کو کے ایم سی کے دائرہ اختیار میں نصب تمام بی ٹی ایس (موبائل فون ٹاورز)پر سالانہ لیوی / ٹیکس عائد کرنے، محکمہ کچی آبادی بلدیہ عظمی کراچی اور بلدیہ عظمی کراچی میں لیڈر آف دی ہائوس اور لیڈر آف دی اپوزیشن کے لئے ایمپریسٹ اکانٹ کی رقم میں اضافہ، عباسی شہید اسپتال بلدیہ عظمی کراچی میں (یوزر چارجز)سے حاصل ہونے والے 100 فیصد چارجز عباسی شہید اسپتال کو چلانے کے لئے خرچ کرنے اور شہر میں گیس کی لوڈشیڈنگ فوری ختم کرنے کی سفارش پر مبنی قراردادوں کی منظوری شامل تھی۔