مودی کی پوری انتخابی مہم یاسین ملک کو سزائے موت دینے کے ارد گرد گھوم رہی ہے، نوجوان کشمیر کی جدوجہد میں ریڑھ کی ہڈی کی حیثیت رکھتے ہیں، مشعال ملک

اسلام آباد (اُردو پوائنٹ اخبارتازہ ترین - اے پی پی۔ 10 دسمبر2023ء) وزیراعظم کی معاون خصوصی برائے انسانی حقوق و ترقی نسواں مشعال حسین ملک نے کہا ہے کہ ہندوستان نے مسئلہ کشمیر کے پرامن حل کے ہر موقع کو مسلسل ناکام بنایا ہے، اپنے شوہر اور کشمیری حریت رہنما محمد یاسین ملک کے لیے منصفانہ اور شفاف ٹرائل پر زور دیتے ہوئے مشعال ملک نے کہا کہ مودی کا پورا انتخابی بیانیہ یاسین ملک کو سزائے موت سنائے جانے کے گرد گھوم رہا ہے۔

اتوار کو یہاں جاری پریس ریلیز کے مطابق وہ بھارت کے غیر قانونی مقبوضہ جموں و کشمیرمیں انسانی حقوق کی خلاف ورزیوں اور اقوام متحدہ کے کردار پر توجہ کے عنوان سے منعقدہ کشمیر کانفرنس سے خطاب کررہی تھیں۔ تقریب کا انعقاد انسانی حقوق کے عالمی دن کی مناسبت سے ہیومن رائٹس کونسل آف پاکستان نے کیا تھا۔

(جاری ہے)

معاون خصوصی مشعال ملک نے اقوام متحدہ کے ہائی کمشنر برائے انسانی حقوق کی 2018 اور2019 کی دو رپورٹس پر عالمی توجہ کی ضرورت پر زور دیا تاکہ بھارت کے غیر قانونی مقبوضہ جموں و کشمیر میں بھارت کی انسانی حقوق کی خلاف ورزیوں کو روکا جا سکے۔

انہوں نے بین الاقوامی انسانی حقوق کے مبصرین کی مقبوضہ جموں کشمیر تک محدود رسائی پر گہری تشویش کا اظہار کیا۔ انہوں نے بھارت کی طرف سے مسلط کردہ معلومات اور مواصلات کی بندش پر افسوس کا اظہار کرتے ہوئے کہا کہ ہندوستان نے مقبوضہ جموں کشمیر میں انسانی حقوق کی خلاف ورزیوں کی اصل تصویر بین الاقوامی برادری تک پہنچنے سے روک دی ہے۔ مقبوضہ کشمیر میں زمینی صورتحال اس سے کہیں زیادہ سنگین ہے جس کی اطلاع دنیا کو پہنچ رہی ہے۔

انہوں نے کہا کہ بھارت کے غیر قانونی مقبوضہ جموں و کشمیر کی زمین گمنام قبروں سے بھری پڑی ہے۔ بھارت کشمیریوں کو بے دریغ قتل کر رہا ہے اور اہل خانہ اپنے پیاروں کی لاشوں کا انتظار کرتے رہ گئے ہیں۔ انہوں نے یہ بھی کہا کہ بھارت عصمت دری کو خواتین، مردوں اور بچوں کے خلاف ہتھیار کے طور پر استعمال کر رہا ہے۔مشعال ملک نے کہا کہ اقوام متحدہ، جو کہ ابتدائی طور پر کشمیر اور فلسطین جیسے عالمی تنازعات کو پرامن طریقے سے حل کرنے کے لیے بنایا گیا تھا، بھارت کو جموں و کشمیر میں اپنی منظور کردہ قراردادوں اور انسانی حقوق کے کنونشنز پر عمل کرنے میں ناکام رہا ہے۔

انہوں نے اقوام متحدہ کی جنرل اسمبلی میں بھارت کے غیر قانونی مقبوضہ جموں و کشمیر کے لوگوں کی نمائندگی کا بھی مطالبہ کیا، تاکہ بین الاقوامی سطح پر ان کو اپنی آواز بلند کرنے کا موقع فراہم ہو۔مشعال ملک نے کسی بھی تحریک کی کامیابی میں نوجوانوں کے کردار پر زور دیا۔ انہوں نے جموں و کشمیر کے اہم اور پیچیدہ مسئلے پر نوجوانوں میں بیداری پیدا کرنے کے لیے تعلیمی اداروں میں کشمیر کے لیے وقف سیل بنانے پر بھی زور دیا۔

انہوں نے بین الاقوامی عدالتوں میں کشمیر کے منصفانہ کاز کو اجاگرکرنے کے لیے حکومتی سطح پر قانونی ادارہ کے قیام کی تجویز پیش کی۔ مشعال ملک نے اسلام کی تعلیمات پر روشنی ڈالتے ہوئے کہا کہ اسلام مذہب اور رنگ سے قطع نظر انسانی حقوق کو برقرار رکھنے کے بنیادی اصولوں پر زور دیتا ہے۔ انہوں نے کہا کہ اسلام جنگ کے دوران بھی عام شہریوں کے قتل، فصلوں، پودوں اور املاک کو تباہ کرنے سے سختی سے منع کرتا ہے۔