کاغذات نامزدگی مسترد،ذوالفقار مرزا اور فہمیدا مرزا کی اپیلوں پر الیکشن کمیشن کو نوٹس جاری، آٹھ جنوری کو جواب طلب

جمعرات 4 جنوری 2024 14:23

کراچی (اُردو پوائنٹ اخبارتازہ ترین - این این آئی۔ 04 جنوری2024ء) سندھ الیکشن ٹربیونل کے جج نے کاغذات نامزدگی مسترد ہونے کے حوالے سے گرینڈ ڈیموکریٹک الائنس کے رہنما ذوالفقار مرزا اور فہمیدا مرزا کی اپیلوں پر سماعت کرتے ہوئے الیکشن کمیشن کو نوٹس جاری کر دیے ہیں۔میڈیا رپورٹ کے مطابق ٹربیونل نے الیکشن کمیشن سے 8 جنوری کو جواب طلب کر لیا ہے۔

(جاری ہے)

یاد رہے کہ 30 دسمبر کو ریٹرننگ افسر (آر او) نے ذوالفقارمرزا کے قومی اسمبلی کے حلقہ این اے 223 اور صوبائی اسمبلی کے 3 حلقوں سے فارم مسترد کیے تھے جبکہ فہمیدہ مرزا کے قومی اسمبلی کے حلقہ این اے 223 سے فارم مسترد ہوئے تھے۔مرزا خاندان کے حریف تصور کیے جانے والے پیپلز پارٹی کے امیدواروں نے ان کاغذات نامزدگی پر اعتراض دائر کرتے ہوئے کہا تھا کہ کاغذات جمع کرانے والے افراد بینک ڈیفالٹر ہیں۔مرزا خاندان نے کاغذات نامزدگی مسترد کیے جانے کے فیصلے کو چیلنج کرنے کا اعلان کیا تھا۔