سیاستدان عوام کو جوابدہ ، ہم نے کام کیا ہے تو آج عوام کے درمیان موجود ہیں، خورشید شاہ

جمعرات 18 جنوری 2024 22:44

سکھر(اُردو پوائنٹ اخبارتازہ ترین - آن لائن۔ 18 جنوری2024ء) سابق وفاقی وزیر ، حلقہ این اے 201 سے پیپلزپارٹی کے نامزد امیدوار سید خورشید احمد شاہ نے کہا ہے کہ سیاستدان عوام کو جوابدہ ہوتا ہے ہم نے کام کیا ہے تو آج عوام کے درمیان موجود ہیں اور عوام کو جوابدہ ہیں پارٹی قیادت نے سابقہ اراکین کو ہی بہتر کارکردگی کی بنیاد پر ٹکٹ جاری کیے ہیں۔ ان خیالات کا اظہار انہوں نے انتخابی مہم کے سلسلے میں تاجر سیکریٹریٹ گولڈ سینٹر صرافہ بازار میں سکھر اسمال ٹریڈرز کے صدر حاجی محمد جاوید میمن سے ملاقات اور تاجروں ، سیاسی، سماجی رہنمائوں سے خطاب کے دوران کیا۔

انہوں نے کہا ہم نے سکھر میں صحت و تعلیم کے مثالی ادارے قائم کیے، این آئی سی وی ڈی ، ایس آئی یو ٹی ،اسپتال سے نہ صرف سکھر بلکہ پورے سندھ، پنجاب، بلوچستان کے لوگ مستفید ہو رہے ہیں اور انہیں مفت علاج کی بہترین سہولیات فراہم کی جا رہی ہیں۔

(جاری ہے)

اس طرح سکھر میں معیاری تعلیم کے لیے یونیورسٹیوں اور کالجوں کا جال بچھایا، آئی بی اے یونیورسٹی، بیگم نصرت بھٹو وومن یونیورسٹی، آرٹ اینڈ ڈیزائن کالج، غلام محمد مہر میڈیکل کالج، انجینئرنگ کالج سمیت متعدد تعلیمی ادارے قائم کیے جو ہمارے مستقبل کو روشن کرنے کیلئے اپنی خدمات سرانجام دے رہے ہیں،تاجر برادری نے ہمیشہ سکھر شہر کی تعمیر و ترقی اور مسائل کے حل کیلئے نشاندہی کی ہے، انشاء اللہ انتخابات میں کامیابی حاصل کر کے ماضی کی طرح آئندہ بھی تاجروں، شہریوں کے مسائل کے حل اور شہر کی تعمیر و ترقی کیلئے مزید بہتر انداز سے خدمات سرانجام دینگے۔

اس موقع پر حلقہ این اے 200 کے امیدوار نعمان اسلام شیخ، پی ایس 25 کے امیدوار سید ناصر حسین شاہ، پی ایس 24 کے امیدوار سید فرخ شاہ نے بھی خطاب کیا۔#