سکھر کے امیدواروں اور سیاسی رہنمائوں کا انتخابات میں شفافیت پر تشویش کا اظہار

سکھر(اُردو پوائنٹ اخبارتازہ ترین - آن لائن۔ 18 جنوری2024ء) سکھر کے امیدواروں اور سیاسی رہنمائوں نے انتخابات میں شفافیت پر تشویش کا اظہار کرتے ہوئے الیکشن کمیشن سے قواعد پر سختی سے عملدرآمد کی درخواست کر دی ہے یہ درخواست انہوںنے گذشتہ روز سماجی تنظیم ناری فائونڈیشن نے فافن، جے ایس ایف اور سی ایس ڈی این کے مشترکہ تعاون سے سکھر پریس کلب میں ’’سیاسی جماعتوں اور امیدواروں کے ساتھ الیکشن کمیشن کے اخلاقی اصول‘‘ کے موضوع پر سیمینار کے انعقاد پر کیا، سیمینار سے ناری فائونڈیشن کی چیئرپرسن افشاں اصغر اور ایگزیکٹو ڈائریکٹر انور مہرنے اپنے خطابات میں کہا کہ تمام سیاسی جماعتوں اور انتخابی امیدواروں کی ذمہ داری ہے کہ وہ ملک میں شفاف اور پرامن انتخابات کے لیے الیکشن کمیشن کے قائم کردہ اخلاقی اصولوں پر عمل کریں۔

(جاری ہے)

ان کا کہنا تھا کہ پاکستان میں جمہوری نظام کے استحکام کے لیے شفاف انتخابات ضروری ہیں۔سیمینار سے خطاب کرتے ہوئے سکھر سے تحریک انصاف کی امیدوار پی ایس 24 صفیہ بلوچ اور این اے 200 سے پی ٹی آئی کی امیدوار ڈاکٹر ربنواز کلوڑ نے کہا کہ ملک میں انتخابات میں بڑے پیمانے پر دھاندلی ہوئی ہے۔ملک کی سب سے بڑی جماعت کو انتخابات سے باہر رکھنے کے لیے ہر سطح پر تمام حربے استعمال کیے گئے، یہاں تک کہ پی ٹی آئی سے اس کا شناختی نشان چھین لیا گیا۔

انہوں نے کہا کہ یہ جمہوریت اور شفاف الیکشن ہے جس میں ایک بڑی جماعت کو مکمل طور پر بے دخل کرنے کی سازش کی گئی ہے۔پی ایس 24 پر ایم کیو ایم کے امیدوار ایڈووکیٹ سراج احمد خان نے کہا کہ پاکستان میں الیکشن پیسے کا کھیل بن چکا ہے۔ملک میں سیاسی کارکنوں کا مستقل ختم ہو چکا ہے، سرمایہ کار، صنعتکار اور جاگیردار سیاسی جماعتوں پر قابض ہو چکے ہیں۔

الیکشن کمیشن اپنے قوانین پر عملدرا?مد کرانے میں ناکام رہا ہے،مسلم لیگ (ن) کے صدر خورشید میرانی نے کہا کہ شفاف انتخابی عمل کے لیے تمام سیاسی جماعتوں کو تحمل اور تحمل سے جمہوری رویہ اپنانا چاہیے۔ پیپلز پارٹی خواتین ونگ کی رہنما قمر النساء پھلپوٹو اور سماجی رہنما ازالہ کاشف نے کہا کہ پرامن اور شفاف انتخابات ملک کے لیے بہتر ہیں، سیاسی جماعتوں کو مقابلے کے ساتھ ساتھ اصولوں پر عمل کرنا چاہیے۔سیمینار میں JSF (EQUIP) کے پروگرام منیجر زبیر حسین، ایڈوکیٹ حیدر مہر، سول سوسائٹی کے رہنما زاہد خاصخیلی، نے شرکت کی جبکہ مسلم لیگ فنکشنل کے نوجوان رہنما ارباز عباسی،ایڈووکیٹ رابعہ بھٹی، صنم، عبدالمنان، راحیلہ انصاری اور دیگر نے بھی خطاب کیا۔