کراچی کی تین نشستوں پر جے یو آئی (ف) کے امیدوار ایم کیو ایم کے حق میں دستبردار

یہ سیٹ ایڈجسٹمنٹ کے لیے نہیں، قومی اتفاق رائے کے لیے کیا جارہا ہے‘ سینئر رہنما ایم کیو ایم فاروق ستار

پیر 5 فروری 2024 18:23

کراچی (اُردو پوائنٹ اخبارتازہ ترین - این این آئی۔ 05 فروری2024ء) متحدہ قومی موومنٹ پاکستان کے سینئر ڈپٹی کنوینر فاروق ستار نے کہا ہے کہ کراچی کی تین نشستوں پر جمعیت علمائے اسلام (ف)کے امیدوار ایم کیو ایم کے حق میں دستبردار ہوگئے ہیں،یہ سیٹ ایڈجسٹمنٹ کے لیے نہیں، قومی اتفاق رائے کے لیے کیا جارہا ہے۔میڈیا سے گفتگو کرتے ہوئے انہوں نے کہا کہ ایم کیو ایم نے ہم خیال جماعتوں سے قربتوں کا سلسلہ جاری رکھا ہے، مولانا فضل الرحمن کے تعاون کا سلسلہ این اے 244، پی ایس 116 اور پی ایس 117 تک پہنچ گیا ہے۔

انہوں نے بتایا این اے 244 پر ان کے حق میں جے یو آئی کے امیدوار قاری یونس قاسمی دستبردار ہورہے ہیں۔پی ایس 116 سے جے یو آئی کے امیدوار سمیع سواتی ایم کیو ایم کے محمد راحیل کے حق میں دستربردار ہو رہے ہیں جبکہ پی ایس 117 سے مصطفی برکی ایم کیو ایم کے حق میں دستبردار ہو رہے ہیں۔

(جاری ہے)

فاروق ستار نے کہا کہ انتخابات کے بعد ایک مضبوط حکومت قائم کریں گے، اتحادیوں کے ساتھ وفاق اور سندھ میں مستحکم حکومت قائم ہوگی۔انہوں نے کہا کہ یہ سیٹ ایڈجسٹمنٹ کے لیے نہیں، قومی اتفاق رائے کے لیے کیا جارہا ہے، یہ بڑی بات ہے جے یو آئی کے ہزاروں ووٹرز پتنگ پر مہر لگائیں گے۔انہوں نے کہا کہ کراچی کی ترقی میں ہر زبان بولنے والی سیاسی جماعتیں ہاتھ بڑھا رہی ہیں۔