پنجاب کے قصبے للیانی میں خواتین کو پہلی مرتبہ ووٹ کاسٹ کرنے کی اجازت مل گئی

ماضی میں اس علاقے میں 2013 ءاور 2018 ءمیں بھی پنچائیت نے خواتین کو ووٹ دینے سے روک دیا تھا

فیصل علوی جمعرات 8 فروری 2024 14:02

سرگودھا(اردو پوائنٹ اخبارتازہ ترین۔08 فروری2024 ء) ملک بھر میں ہونے آج عام انتخابات میں جہاں شہری آبادیوں کے ساتھ ساتھ دیہاتوں میں بھی خواتین ووٹ کاسٹ کر رہی ہیں وہیں پنجاب کے قصبے للیانی میں خواتین کو پہلی مرتبہ ووٹ کاسٹ کرنے کی اجازت مل گئی،ضلع سرگودھا اور تحصیل کوٹ مومن کے قصبہ للیانی میں خواتین اپنا ووٹ کاسٹ کررہی ہیں۔میڈیا رپورٹس کے مطابق این اے 83 اور پی پی 73 میںبھی خواتین ووٹ کاسٹ کرنے کیلئے گھروں سے اجازت ملنے کے بعد نکلی ہیں جبکہ ماضی میںاس علاقے میں 2013 ءاور 2018 ءمیں بھی پنچائیت نے خواتین کو ووٹ دینے سے روک دیا تھا۔

الیکشن کمیشن آف پاکستان کے بنائے گئے قانون کے تحت ملک میں ہونے والے انتخابات کے کسی بھی حلقہ میں کاسٹ کئے گئے ووٹوں میں اگر خواتین کے ووٹوں کا تناسب 10 فیصد نہ ہوا تو وہ نتائج قبول نہیں کئے جائیں گے۔

(جاری ہے)

یاد رہے کہ آج ملک بھر میں عام انتخابات کیلئے پولنگ کا عمل جاری ہے جو بغیر کسی وقفے کے صبح 8 بجے سے شام 5 بجے تک جاری رہے گا۔عام انتخابات کے دوران قومی اور چاروں صوبائی اسمبلیوں کے 855 حلقوں کیلئے 882 خواتین اور 4 خواجہ سراﺅں سمیت ملک کی تاریخ میں سب سے زیادہ امیدوار حصہ لے رہے ہیں جن کی تعداد 17 ہزار 816 بنتی ہے۔

عام انتخابات کیلئے جاری پولنگ کے دوران ملک بھر میں 12 کروڑ 85 لاکھ 85 ہزار 760 ووٹرز آج اپنا حق رائے دہی استعمال کر ینگے۔ووٹ ڈالنے کیلئے ووٹرز کو اصل شناختی کارڈ دکھانا لازم ہوگا، قومی اسمبلی کیلئے سبز اور صوبائی اسمبلی کیلئے سفید بیلٹ پیپر ہوگا۔پولنگ سٹیشنز پر سکیورٹی کے خاص انتظامات کئے گئے ہیں، امن و امان کیلئے پولیس، رینجرز اور پاک فوج کے دستے تعینات ہیں۔

قومی اسمبلی کی 265 اور صوبائی اسمبلیوں کی 591 نشستوں پر امیدوار میدان میں ہیں، قومی اسمبلی کے امیدواروں کی مجموعی تعداد 5 ہزار 254 ہے، پنجاب سے قومی اسمبلی کی 141، صوبائی اسمبلی کی 296 نشستوں پر امیدوار میدان میں ہیں۔عام انتخابات کیلئے ملک بھر میں 90 ہزار 675 پولنگ سٹیشنز قائم کئے گئے ہیں، مردوں کیلئے 25 ہزار 320، خواتین کیلئے 23 ہزار 952 پولنگ سٹیشن بنائے گئے ہیں جبکہ مشترکہ پولنگ سٹیشنز کی تعداد 41 ہزار 403 ہے۔