انتخابی نتائج میں تاخیر، سیاسی جماعتوں کے کارکنان سراپا احتجاج

جمعہ 9 فروری 2024 17:48

اسلام آباد /کراچی/لاہور/کوئٹہ (اُردو پوائنٹ اخبارتازہ ترین - این این آئی۔ 09 فروری2024ء) ملک بھر میں انتخابات کے نتائج میں تاخیر کے خلاف مختلف سیاسی جماعتوں کے امیدوار، کارکنان سمیت دیگر افراد نے احتجاج کیا ۔تفیلات کے مطابق کراچی کے ضلع غربی کے ڈسٹرکٹ ریٹرننگ آفیسر (ڈی آر او) آفس کو سیل کردیا گیا اور سیکورٹی خدشات کے باعث ڈی آر او آفس کے باہر پولیس اور رینجرز کو تعینات کردیا گیا ہے۔

پی ٹی آئی کارکن کے مطابق نتائج نہ ملنے پر ڈی آر او آفس کے باہر جمع ہوئے ہیں، فارم 45 کے مطابق جیت چکے ہیں تاہم نتائج روک دیے گئے ہیں۔کوئٹہ میں ہزارہ ڈیموکریٹ پارٹی نے الیکشن کے نتائج میں تاخیر کے خلاف کمشنر آفس کے سامنے احتجاجی مظاہرہ کیا۔احتجاجی مظاہرے میں پی بی 42 کے امیدوار عبدالخالق ہزارہ، پی بی 40 کے امیدوار قادر علی سمیت دیگر شریک ہوئے ۔

(جاری ہے)

چیئرمین ایچ ڈی پی عبدالخالق ہزارہ نے بتایا کہ خدشہ ہے ہمارے ساتھ ناانصافی کی جارہی ہے، گزشتہ رات سے ہم یہاں موجود ہیں لیکن ہمیں نتائج نہیں دئیے جارہے۔کوہاٹ کے ڈگری کالج کے باہر نتائج میں تاخیر ہونے کے خلاف پی ٹی آئی کے حمایت یافتہ کارکنوں نے شدید احتجاج کیا ۔احتجاجی مظاہرے کے باعث کسی کو بھی ڈگری کالج کے احاطے میں جانے کی اجازت نہیں دی گئی ، پولیس کی بھاری نفری طلب کرلی گئی ہے۔باجوڑ سے صوبائی اسمبلی کے حلقے پی کے 20 اور 21 کے نتائج میں تاخیر کے خلاف پی ٹی آئی کے کارکنان نے پشاور کے علاقے باجوڑ کی شاہراہ پر احتجاج مظاہرہ کئے ۔ٹوبہ ٹیک سنگھ سے قومی اسمبلی کے حلقے این اے 106 کے نتائج میں بھی تاخیر کے خلاف پی ٹی آئی کے کارکنوں نے شدید احتجاج کیا ۔