2018 کی نسبت 2024 کے الیکشن میں ووٹنگ ٹرن آؤٹ کم رہا ،سینیٹر محمد عبدالقادر

کوئٹہ(اُردو پوائنٹ اخبارتازہ ترین - این این آئی۔ 16 فروری2024ء) چیئرمین اسٹینڈنگ کمیٹی برائے پیٹرولیم و رسورسز اور سیاسی و اقتصادی امور کے ماہر سینیٹر محمد عبدالقادر نے کہا ہے کہ الیکشن 2018 کی نسبت 2024 کے الیکشن میں ووٹنگ ٹرن آؤٹ کم رہا امسال ووٹنگ ٹرن آؤٹ 47.6 فیصد رہا جبکہ 2018 کے الیکشن ووٹنگ ٹرن آؤٹ 52.1 فیصد رہا دونوں الیکشن کے درمیان ووٹنگ ٹرن آؤٹ میں فرق 4.5 فیصد کم تھا الیکشن 2024 میں 6 کروڑ 6 لاکھ ووٹرز نے ووٹ کا حق استعمال کیا۔

اپنے ایک بیان میں انہوں نے کہا کہ پاکستان 2018 کے منعقدہ الیکشن کی نسبت 58 لاکھ زائد ووٹ پول کئے گئے البتہ ووٹ ڈالنے کی شرح کم رہی سال 2018 میں رجسٹرڈ ووٹروں کی تعداد 10 کروڑ 60 لاکھ تھی جبکہ 2024 میں12 کروڑ 86 لاکھ تھی. قومی اسمبلی میں سب سے زیادہ ٹرن آؤٹ این اے 214 تھرپارکر میں 70.9 فیصد رہا دوسری جانب سب سے کم ٹرن آؤٹ این اے 42 جنوبی وزیرستان میں 16.3 رہا 2018 میں اسلام آباد میں ٹرن آؤٹ 58.3 فیصد تھا جبکہ 2024 میں ٹرن آؤٹ 54.2 فیصد رہا۔

(جاری ہے)

انہوں نے کہا کہ صوبہ خیبر پختون خواہ میں 2018 کا ووٹر ٹرن آؤٹ 44 فیصد تھا جبکہ 2024 میں ٹرن آؤٹ 39.5 فیصد تھا. پنجاب میں 2018 کا ووٹر ٹرن آؤٹ 56.8 فیصد تھا جبکہ 2024 میں 51.6 فیصد رہا صوبہ سندھ میں 2018 کا ٹرن آؤٹ 47.2 فیصد تھا جبکہ 2024 میں 43.7 فیصد رہا بلوچستان میں 2018 کا ٹرن آؤٹ 45.3 فیصد تھا امسال یہ 42.9 فیصد رہا 2024 میں خواتین ووٹرز کا ٹرن آؤٹ 10 فیصد سے کم نہیں رہا نیشنل اسمبلی کے 254 حلقوں میں خواتین ووٹرز کی تعداد 29 لاکھ اور مرد ووٹر کی تعداد 11 لاکھ بڑھی۔

انہوں نے کہا کہ نیشنل اسمبلی کے 254 حلقوں میں مرد ووٹرز کا ٹرن آؤٹ 55.6 فیصد جبکہ خواتین کا 45.6 رہا امسال ہونے والے الیکشن میں مجموعی طور پر 2 کروڑ سے زائد ووٹرز کی تعداد بڑھی. توقع کی جا رہی تھی کہ ان نوجوان ووٹرز کے اضافے کی وجہ سے ٹرن آؤٹ بھاری رہے گا لیکن ایسا نہ ہوا اسکی وجہ نوجوانوں کا اپنی قیادت پر عدم اعتماد ہے آج کا نوجوان ووٹر اپنے نمائندوں سے مایوس اور بد دل ہوا ہے کیونکہ وہ جانتا ہے کہ سیاست دان انکے مسائل حل نہیں کرتے اور ان میں بڑے پیمانے پر وعدہ خلافی کا رجحان پایا جاتا ہے سیاستدانوں کے اس رویے کی وجہ سے ووٹر مایوس اور بد دل ہوا اور اس نے کسی بھی نمائندے کو ووٹ نہیں دیا۔