عامر ڈوگر نے بھائی کہا، میںبھائی بن کر دکھاونگا، سر دار ایاز صادق

جمہوری انداز میں، سیاست میں تلخیاں پاکستان کے لیے انتہائی نقصان دہ ہیں، خطاب سردار ایاز صادق نے سنی اتحاد کے اسپیکر کے امیدوار عامر ڈوگر کی نشست پر جا کر مصافحہ کیا، گلے ملے

جمعہ 1 مارچ 2024 16:54

عامر ڈوگر نے بھائی کہا، میںبھائی بن کر دکھاونگا، سر دار ایاز صادق

اسلام آباد (اُردو پوائنٹ اخبارتازہ ترین - این این آئی۔ 01 مارچ2024ء) قومی اسمبلی کے 23 ویں اسپیکر منتخب ہونے والے سردار ایاز صادق نے کہا ہے کہ عامر ڈوگر نے ہمیشہ بڑا بھائی کہا ہے اور انہیں بھائی بن کر دکھائوں گا۔ اسپیکر منتخب ہونے کے بعد قومی اسمبلی سے خطاب کرتے ہوئے انہوںنے کہا کہ اللہ کا شکر گزار ہوں کہ تیسری مرتبہ اس منصب پر منتخب ہوا، عامر ڈوگر کا بھی شکریہ کہ انہوں نے اس جمہوری عمل کو مکمل کرایا۔

(جاری ہے)

سر دار ایاز صادق نے کہا کہ اپنی نامزدگی پر قائد نواز شریف کا شکریہ ادا کرتا ہوں، آصف زرداری کا شکر گزار ہوں کہ تیسری مرتبہ اعتماد کیا، ایم کیو ایم کا بھی شکرگزار ہوں کہ دوسری بار اعتماد کا ووٹ دیا۔انہوںنے کہاکہ کوشش ہو گی کہ سب کی مدد سے سیاست میں اتفاقِ رائے پیدا کروں، میری دونوں جانب سے گزارش ہے کہ اختلاف کریں لیکن جمہوری انداز میں، سیاست میں تلخیاں پاکستان کے لیے انتہائی نقصان دہ ہیں۔

قومی اسمبلی کا 23 واں اسپیکر منتخب ہونے کے بعد سردار ایاز صادق نے سنی اتحاد کے اسپیکر کے امیدوار عامر ڈوگر کی نشست پر جا کر ان سے مصافحہ کیا، ان سے گلے ملے، انہوں نے بیرسٹر گوہر، حامد رضا اور عمر ایوب سے بھی مصافحہ کیا۔یوسف رضا گیلانی نے پرجوش طریقے سے گلے لگا کر ایاز صادق کو مبارک باد دی۔