پنجاب پولیس میں نئی بھرتیوں کا عمل، لاہور سمیت 26 اضلاع میں تحریری امتحان کا انعقاد

کانسٹیبل، لیڈی کانسٹیبل، ڈرائیور کانسٹیبل، ٹریفک اسسٹنٹ کی 7909 آسامیوں پر 47023 امیدوار وں نے تحریری امتحان دیا

ہفتہ 23 مارچ 2024 03:20

لاہور (اُردو پوائنٹ اخبارتازہ ترین - این این آئی۔ 23 مارچ2024ء) انسپکٹر جنرل پولیس پنجاب ڈاکٹر عثمان انور نے کہاہے کہ محکمہ پولیس میں نفری کی کمی کو پورا کرنے کیلئے خالی آسامیوں پر محنتی، قابل اور باصلاحیت نوجوانوں کو بھرتی کرکے فورس کا حصہ بنایا جارہا ہے، اسی سلسلے میں لاہور سمیت صوبے کے 26 اضلاع میں کانسٹیبلان کی بھرتی کیلئے تحریری امتحان کا انعقادکیا گیا جس میں ہزاروں امیداروں نے حصہ لیا ،ترجمان پنجاب پولیس نے بتایا کہ کانسٹیبل، لیڈی کانسٹیبل، ڈرائیور کانسٹیبل اورٹریفک اسسٹنٹ کی 7909 آسامیوں پرمجموعی طور پر 47023 امیدواروں نے تحریری امتحانات دئیے ۔

صوبہ کے 26اضلاع میں کانسٹیبل/لیڈی کانسٹیبل کی 6089 آسامیوں پر 36570 امیدوار ، ڈرائیور کانسٹیبل کی 190 سیٹوں پر 1163 امیدوارجبکہ ٹریفک اسسٹنٹ کی 1630 آسامیوں پر 9290 امیدوار وں نے امتحان دئیے ۔

(جاری ہے)

صوبائی دارالحکومت لاہور میں2951 مجموعی سیٹوں پر 5574 امیدوارو ں نے امتحان دیا، لاہور میں کانسٹیبل کی 2586 آسامیوں پر 4075، ڈرائیور کانسٹیبل کی 50 آسامیوں پر 109 جبکہ ٹریفک اسسٹنٹ کی 315 آسامیوں پر 1390 امیدواروں نے امتحان دیا ۔

ترجمان پنجاب پولیس نے بتایا کہ گوجرانوالہ میں 491، گجرات میں 460، فیصل آباد میں 441، راولپنڈی میں367 سیٹوں،سرگودھا میں 337، ڈی جی خان میں231، بہاولپور میں 255، منڈی بہاؤالدین میں 240، مظفر گڑھ میں 224 آسامیوں پر نئی بھرتی کی جا رہی ہے۔ باقی اضلاع میں بھی سینکڑوں آسامیوں پر ہزاروں امیدوار امتحانات دے رہے ہیں۔آئی جی پنجاب ڈاکٹر عثمان انور کی ہدایت پر سپروائزری افسران نے تمام اضلاع میں تحریری امتحان کے انتظامات کی خود نگرانی کی اور ہر ضلع میں امتحان کے انعقاد کیلئے پولیس ٹیموں نے مکمل شفاف اور فول پروف انتظامات یقینی بنائے ۔