پی ٹی آئی ججز کے خط کے معاملے کو سیاسی رنگ دینے کی کوشش کر رہی ہے، وزیر قانون

منگل 2 اپریل 2024 23:50

اسلام آباد (اُردو پوائنٹ اخبارتازہ ترین - اے پی پی۔ 02 اپریل2024ء) وفاقی وزیر قانون و انصاف سینیٹر اعظم نذیر تارڑ نے کہا ہے کہ پاکستان تحریک انصاف (پی ٹی آئی) اور اس کے بانی کے بیانات اسلام آباد ہائی کورٹ کے ججوں کے خط کے معاملے میں سپریم کورٹ کے ازخود نوٹس کے معاملے کو سیاسی رنگ دینے کی کوشش ہے۔ پی ٹی آئی رہنما بیرسٹر گوہر کے بیان پر ردعمل دیتے ہوئے وفاقی وزیر نے کہا کہ اس ملک میں صرف آئین پر عمل کیا جائے گا، پی ٹی آئی کے بانی نے جو کہا وہ قانون نہیں ہے۔

(جاری ہے)

انہوں نے کہا کہ جو لوگ اپنے دور حکومت میں ججوں کے خلاف ریفرنسز بناتے رہے ہیں انہیں حکومت کو مشورہ نہیں دینا چاہیے۔ وزیر قانون نے کہا کہ بیرسٹر گوہر جو خود وکیل ہیں انہیں معلوم ہونا چاہیے کہ بینچ آئین کے آرٹیکل 184 (3) کے تحت تشکیل دیا گیا ہے۔ اعظم نذیر تارڑ نے کہا کہ سپریم کورٹ کی فل کورٹ نے ججز کے خط سے پوچھ گچھ کے لیے ڈیکلریشن جاری کر دیا ہے۔ انہوں نے کہا کہ کسی بھی معاملے پر بینچ تشکیل دینا چیف جسٹس آف پاکستان اور سینئر ججز کی کمیٹی کی صوابدید ہے۔ وفاقی وزیر نے کہا کہ اگر عدلیہ کی آزادی سے متعلق ایک اہم معاملے کو سیاسی رنگ نہ دیا جائے تو یہ ملک اور عدلیہ کے لئے اچھا ہوگا۔