ملک کے بیشتر مقامات پر آئندہ 24 گھنٹوں کے دوران آندھی اور گرج چمک کے ساتھ بارش کا امکان، محکمہ موسمیات

بدھ 17 اپریل 2024 20:32

اسلام آباد (اُردو پوائنٹ اخبارتازہ ترین - اے پی پی۔ 17 اپریل2024ء) خیبر پختونخوا، گلگت بلتستان، کشمیر، پنجاب، سندھ، اسلام آباد، خطہ پوٹھوہار اور بلوچستان کے بیشتر مقامات پر آئندہ چوبیس گھنٹوں کے دوران آندھی، جھکڑ چلنے اور گرج چمک کے ساتھ بارش جبکہ بعض مقامات پر موسلادھار بارش ، ژالہ باری کا بھی امکان ہے۔ محکمہ موسمیات کے مطابق گزشتہ 24 گھنٹوں کے دوران ملک کے بیشتر علاقوں میں موسم خشک اور مطلع جزوی ابر آلود رہا ۔

بلوچستان اور بالائی سندھ میں بعض مقامات پر آندھی اور گرج چمک کے ساتھ بارش جبکہ اس دوران جنوبی بلوچستان میں موسلا دھار بارش بھی ہوئی۔ سب سے زیادہ بارش گوادر میں 94، جیوانی 84، پسنی31، تربت، پنجگور 26، خضدار، قلات 11، اورماڑہ 8، نوکنڈی 5، دالبندین 0 2، کوئٹہ اور لاڑکانہ میں ایک ملی میٹر بارش ریکارڈ کی گئی۔

(جاری ہے)

بدھ کو ریکارڈ کیے گئے زیادہ سے زیادہ درجہ حرارت کی رپورٹ کے مطابق مٹھی میں درجہ حرارت 42، چھور 40، ٹھٹھہ، بدین اور سبی میں 39 ڈگری سینٹی گریڈ ریکارڈ کیا گیا۔

محکمہ موسمیات نے متنبہ کیا کہ موسلادھار بارش کے باعث بلوچستان کے مقامی اور برساتی ندی نالوں خصوصا (گوادر، جیوانی، پسنی، اوماڑہ، کیچ، آواران، خاران، پنجگور، واشک، نوشکی، لسبیلہ، خضدار اور قلات ) میں طغیانی جبکہ نشیبی علاقے زیر آب آنے کا بھی خدشہ ہے۔ (کل) جمعرات سے 20 اپریل کے دوران دیر، سوات، چترال، کوہستان اور مانسہرہ کے مقامی ندی نالوں اور دریائے کابل سے ملحقہ علاقوں میں طغیانی کا خطرہ ہے۔

اسی طرح 18 سے 21 اپریل کے دوران تیز بارش کے باعث بالائی خیبر پختونخوا، مری، گلیات، کشمیر اور گلگت بلتستان میں لینڈ سلائیڈنگ کا بھی خدشہ ہے۔ مزید برآں آندھی، جھکڑ ، ژالہ باری، گرج چمک اور تیز بارش کے باعث کھڑی فصلوں، کمزور انفرا سٹرکچر کو نقصان کا بھی اندیشہ ہے۔ محکمہ موسمیات نے شہریوں سے محتاط رہنے کی اپیل کی ہے تاکہ کسی بھی جانی یا مالی نقصان سے محفوظ رہ سکیں۔