آئندہ 4 سال کیلئے ملک بھر میں تعلیمی ایمرجنسی نافذ کرنے کا فیصلہ، وزیراعظم (کل) اعلان کرینگے

پیر 29 اپریل 2024 23:10

اسلام آباد (اُردو پوائنٹ اخبارتازہ ترین - این این آئی۔ 29 اپریل2024ء) گلگت بلتستان اور آزاد کشمیر سمیت ملک بھر میں آئندہ 4 سال کے لیے تعلیمی ایمرجنسی نافذ کرنے کا فیصلہ کرلیا گیا جبکہ وزیراعظم شہباز شریف اس حوالے سے (کل) منگل کو باضابطہ اعلان کریں گے۔میڈیا رپورٹ کے مطابق وفاقی وزارت تعلیم کے زیر انتظام تعلیمی ایمرجنسی نفاد کی کانفرنس (آج) منگل کو اسلام آباد میں ہوگی۔

(جاری ہے)

وزیراعظم شہباز شریف کی زیرصدارت اس کانفرنس میں چاروں صوبوں کے وزرائے اعلیٰ اور وزرائے بھی شرکت کریں گے۔وزیراعظم کانفرنس میں تعلیمی ایمرجنسی نافد کرنے کا باضابطہ اعلان کریں گے اس سلسلے میں تعلیمی بجٹ کو بھی صفر اعشاریہ پانچ سے بڑھا کر آئندہ چار سال میں پانچ فیصد کرنے کا ہدف ہے۔وفاقی وزارت تعلیم نے انکشاف کیا کہ پاکستان میں 2 کروڑ 60 لاکھ سے زیادہ بچے اسکولوں سے باہر ہیں، چار سال میں یہ تعداد کم کرکے 90 لاکھ تک لانے کا ہدف رکھا گیا ہے۔واضح رہے کہ رواں ماہ کے شروع میں وفاقی وزیر تعلیم خالد مقبول صدیقی نے کہا تھا کہ میرا وزیر اعظم سے مطالبہ ہے ملک میں تعلیمی ایمرجنسی لگائی جائے۔