جس معاشرے میں بات چیت کے راستے بند ہوں وہ معاشرہ جبر کا ہوتا ہے،شیخ جعفر خان مندو خیل

بلوچستان کے ساتھ وفاق نہیں ،یہاں کے لوگ ہی زیادتی کررہے ہیں ، امن وامان کیلئے سب سے بات چیت کو تیار ہوں،گور نر بلو چستان

پیر 6 مئی 2024 19:35

کوئٹہ (اُردو پوائنٹ اخبارتازہ ترین - این این آئی۔ 06 مئی2024ء) گورنر بلوچستان شیخ جعفر خان مندوخیل نے کہا ہے کہ جس معاشرے میں بات چیت کے راستے بند ہوں وہ معاشرہ جبر کا ہوتا ہے امن وامان کیلئے جو بات چیت کرنا چاہتا ہے سب سے بات کرنے کو تیار ہوں،بلوچستان کے ساتھ وفاق نہیں بلکہ یہاں کے لوگ ہی زیادتی کررہے ہیں ، وفاق سے جو پیسے ملتے ہیں ان کا کوئی حساب کتاب نہیں ہے صوبے میں گڈ گورننس ہوگی تو وفاق بھی مدد کے لئے آگے آئے گا ۔

یہ بات انہوں نے نے حلف برداری کی تقریب کے بعد میڈیا سے بات چیت کرتے ہوئے کہی ۔ انہوں نے کہا کہ صوبے کے حقوق کیلئے پہلے بھی بات کی ہے اور آئندہ بھی کریں گے صوبے کا مقدمہ لڑا ہے اور لڑتے رہیں گے امن وامان اولین ترجیح ہوگی امن وامان کے حوالے سے جو کردار ہوا ادا کرونگا۔

(جاری ہے)

گورنر بلوچستان شیخ جعفر مندوخیل نے کہا کہ وفاقی حکومت سے کی جانب سے ابھی تک تو کوئی خاص ٹاسک نہیں دیا گیا ہے ،وفاقی حکومت کے ساتھ بیٹھیں گے گورنر کے طور پر جو رول ہوا دا کروں گا۔

گورنر بلوچستان کا کہنا تھا کہ امن وامان کیلئے جو بات چیت کرنا چاہتا ہے سب سے بات کرنے کو تیار ہوںجس معاشرے میں بات چیت کے راستے بند ہوںوہ معاشرہ جبر کا ہوتا ہے ۔انہوں نے کہا کہ میں نے 35سال صوبے میںپارلیمانی سیاست کی ہے صوبائی حکومت کے ساتھ بہترین تعلقات ہونگے۔انہوں نے کہا کہ صوبے کی ترقی کی سمت درست کرنا ہوگاصوبے میں مالی نظم و ضبط لانے کی ضرورت ہے ماضی میں فنڈز کا غلط استعمال کیا گیاصوبے میں فنڈز کے درست استعمال کو فروغ دیں گے صوبے میں گڈ گورننس اور میرٹ ہونگے تو وفاق بھی مدد کے لئے آگے آئے گا۔

ایک سوال کے جواب میں شیخ جعفر مندوخیل کا کہنا تھا کہ گوادر میں باڑ کے حوالے سے علم نہیں سیکورٹی معاملات پر بریفنگ کے بعد تبصرہ کرونگا۔انہوں نے کہا کہ کوئٹہ سمیت ملک بھر میں توانائی کا بحران ہے گیس بحران کے حل کے لئے ذرائع تلاش کرنے کی ضرورت ہے۔