بی جے پی نے جموں وکشمیر کو تباہی کے دہانے پر پہنچا دیا ہے، کشمیری اس کے گماشتوں کو مسترد کردیں، فاروق عبداللہ

جمعرات 16 مئی 2024 11:48

سرینگر (اُردو پوائنٹ اخبارتازہ ترین - اے پی پی۔ 16 مئی2024ء) بھارت کے غیر قانونی زیرتسلط جموں وکشمیر میں نیشنل کانفرنس (این سی) کے صدر فاروق عبداللہ نے کشمیریوں پر زور دیا ہے کہ وہ بھارتیہ جنتا پارٹی(بی جے پی) کی سازشوں سے ہوشیار رہیں اور علاقے میں موجود اس کے گماشتوں کو مسترد کریں۔

(جاری ہے)

کشمیر میڈیا سروس کے مطابق فاروق عبداللہ نے ضلع اسلام آباد کے علاقے شانگوس میں ایک ریلی سے خطاب کرتے ہوئے کہا کہ بی جے پی جموں و کشمیر کے لوگوں کو دیوار کے ساتھ لگا رہی ہے ، کشمیری افسروں کو نظر انداز کر کے غیر کشمیری نوکر شاہی کو مسلط کر رہی ہے جو کشمیریوں کو درپیش مسائل سے ناواقف ہے۔

فاروق عبداللہ نے کہا کہ بی جے پی نے ہزاروں ،لاکھوں لوگوں کو نوکری دینے کے وعدے کئے تھے جو سراب ثابت ہوئے ہیں۔ انہوں نے کہا کہ بی جے پی اپنی کٹھ پتلیوں کے ذریعہ ووٹوں کو تقسیم کرنے کی کوشش کر رہی ہے لہذا علاقے کے تمام خطوں کے لوگوں کو ان سازشوں سے چوکنا رہنا ہوگا اور بی جے پی کے چھپے اتحادیوں کو مسترد کرنا ہوگا۔ انہوں نے کہا کہ بی جے پی نے بھارت کے غیر قانونی زیر تسلط جموں وکشمیر کو تباہی کے دہانے پر پہنچا دیا ہے، پارلیمانی انتخابات میں بی جے پی اور اس کی کٹھ پتلیوں کو شکست دینا لازمی ہے۔