ریسٹورنٹس کے مالکان کھانے کی اشیائمیں فورٹیفائیڈ آٹا اور خوردنی تیل استعمال کریں۔ ڈائریکٹر جنرل سندھ فوڈ اتھارٹی آغا فخر حسین

اتوار 9 جون 2024 18:00

کراچی (اُردو پوائنٹ اخبارتازہ ترین - آن لائن۔ 09 جون2024ء) ڈائریکٹر جنرل سندھ فوڈ اتھارٹی آغا فخر حسین نے کہا ہے کہ قانون کے مطابق تمام ریسٹورنٹس اور ہوٹلز کے مالکان کھانے کی اشیاء میں فورٹیفائیڈ آٹا اور خوردنی تیل استعمال کرنے کے پابند ہیں تاکہ اپنے صارفین کو صحت بخش کھانا فراہم کر سکیں۔ یہ بات انہوں نے یہاں سندھ فوڈ اتھارٹی کے زیر اہتمام مقامی ہوٹل میں فوڈ سیفٹی لیول 1 "ریسٹورنٹ اور فوڈ ہینڈلرز کے ساتھ آگاہی سیشن" کے تربیتی سیشن میں بطور مہمان خصوصی خطاب کرتے ہوئے کہی۔

(جاری ہے)

فورٹیفائیڈ خوردنی تیل کے فوائد سے متعلق آگاہی سیشن میں صارفین اور ریسٹورنٹ مالکان کی ایک بڑی تعداد نے شرکت کی۔ اس موقع پر پی پی ایم سندھ معین قریشی، پی پی ایم کے عبدالحفیظ گمبھیر، شکیل احمد بیگ چیئرمین کنزیومر رائٹس پروٹیکشن، عبدالسلام چیئرمین کنزیومر ایسوسی ایشن آف پاکستان اور دیگر ریسٹورنٹس اور ہوٹلز کے مالکان اور مشہور ریسٹورنٹس کے فوڈ ہینڈلرز بھی موجود تھے۔ ڈائریکٹر جنرل سندھ فوڈ اتھارٹی آغا فخر حسین نے فورٹیفائیڈ آٹے اور خوردنی تیل کی اہمیت پر روشنی ڈالی۔