آپ ٹربیونل کا تعصب ثابت کریں یا پھر توہین عدالت کی کارروائی کے لیے تیار رہیں‘جسٹس جہانگیری عدالت کے معززجج ہیں. جسٹس عامر فاروق

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔11 جون۔2024 ) اسلام آباد ہائیکورٹ کے چیف جسٹس عامر فاروق نے قراردیا ہے بادی النظرمیں الیکشن کمیشن پر الیکشن ٹربیونل تبدیل کرنے کا فیصلہ درست نہیں ہے انہوں نے معاملے پراظہارِ برہمی کرتے ہوئے کہا ہے کہ الیکشن کمیشن نے کس گراﺅنڈ پر ٹربیونل تبدیل کیا؟. الیکشن کمیشن کے وکیل نے عدالت کو بتایا کہ یہ ٹربیونل اس لیے تبدیل کیا گیا کیونکہ پروسیجر پر عملدرآمد نہیں کیا گیا جس پر عدالت نے استفسار کیا کہ کس نے پروسیجر پر عملدرآمد نہیں کیا؟الیکشن کمیشن کے وکیل کا کہنا تھا کہ ٹربیونل نے پروسیجر فالو نہیں کیا.

(جاری ہے)

اسلام آباد ہائی کورٹ کے چیف جسٹس نے الیکشن کمیشن کے وکیل کو مخاطب کرتے ہوئے کہا کہ کیا آپ ٹرانسفرز کی نئی جیورس پروڈنس بنا رہے ہیں؟منگل کو الیکشن ایکٹ میں ترمیمی ارڈیننس کے خلاف دائر کی گئی درخواست کی سماعت کرتے ہوئے چیف جسٹس کا کہنا تھا کہ ایک لمحے کے لیے مان لیتے ہیں کہ پہلے سے قائم ٹربیونل کا آرڈر غلط تھا پھر بھی یہ ٹرانسفر کا گراﺅنڈ نہیں ہو سکتا عدالت نے الیکشن کمیشن کے وکیل کو مخاطب کرتے ہوئے کہا کہ آپ تو ایسا سلسلہ شروع کر رہے ہیں جو کہ نہ ختم ہونے والا ہے.

اسلام آباد ہائی کورٹ کے چیف جسٹس نے کہاکہ بادی النظر میں الیکشن کمیشن کا فیصلہ درست نہیں ہے انہوں نے الیکشن کمیشن کے وکیل کو مخاطب کرتے ہوئے کہا کہ اگر پہلے سے موجود الیکشن ٹرنیونل کی جانب سے تعصب ہے تو وہ بتائیں ورنہ الیکشن کمیشن کا فیصلہ درست نہیں ہے. چیف جسٹس عامر فاروق نے الیکشن کمیشن کے وکیل کو مخاطب کرتے ہوئے کہا کہ آپ تعصب ثابت کریں یا پھر توہین عدالت کی کارروائی کا سامنا کریں انہوں نے کہا کہ جسٹس طارق محمود جہانگیری اس عدالت کے فاضل جج ہیں انہوں نے کہا کہ الیکشن کمیشن اس ٹربیونل کے آرڈر چیلنج کر لیتا لیکن ٹرانسفر کیسے اور کیوں کیا ہے؟انہوں نے کہا کہ تعصب کی بنیاد پر کیس ٹرانسفر کیا جاتا ہے مگر اس کا بھی طریقہ ہے انہوںنے کہا کہ سب سے پہلے متعلقہ جج سے ہی درخواست کی جاتی ہے کہ وہ کیس نا سنے اسلام آباد ہائی کورٹ کے چیف جسٹس نے ریمارکس دیتے ہوئے کہا کہ حکومت مجھے سمجھائے کہ سال پہلے یہ ترمیم ختم کی، اب پھر آرڈی نینس کے ذریعے لے آئے انہوں نے کہا کہ کیا ایمرجنسی تھی کہ راتوں رات آرڈینس آ گیا؟.

پاکستان تحریک انصاف کے امیدوارشعیب شاہین نے کہا کہ وہ الیکشن کمیشن کے فیصلے کو چیلنج کریں گے انہوں نے استدعا کی کہ عدالت سٹیٹس کوبرقرار رکھتے ہوئے معاملہ جوں کا توں رکھنے کا آرڈر جاری کر دے. چیف جسٹس نے کہا کہ الیکشن کمیشن نے میری سفارش پریا خود ہی جسٹس طارق جہانگیری کو ٹریبیونل کا جج بنایا تھا؟ اور آرڈر اگر درست نہیں ہے تو اسے چیلنج کرنا درست طریقہ ہے چیف جسٹس عامر فاروق نے الیکشن کمیشن کے وکیل سے استفسار کیا کہ یہ بتائیں کہ الیکشن کمیشن کے پاس ریکارڈ منگوانے کا کونسا اختیار ہے اور کس قانون کے تحت الیکشن کمیشن نے ریکارڈ منگوایا تھا؟.

انہوں نے کہا کہ یہ ساری وہ چیزیں ہیں جن کا جواب الیکشن کمیشن کو دینا ہے عدالت نے کہاکہ الیکشن کمیشن آئینی باڈی ہے اس لیے نوٹس جاری کر کے جواب طلب کیا تھا چیف جسٹس نے استفسار کیا کہ ابھی جو ٹربیونل بنایا ہے کیاوہ اسلام آباد کے لیے ہے؟ جس پر الیکشن کمیشن کے وکیل کا کہنا تھا کہ اس ضمن میں 7جون کو نوٹس ہو چکا ابھی میرے پاس نہیں ہے اور مزید تفصیلات لیکر عدالت کے سامنے رکھوں گا.