خراب موسم کے باوجود حج کے بہترین انتظامات، علما و مشائخ و سیاسی عمائدین کا سعودی فرمانروا شاہ سلمان ،ولی عہد محمد بن سلمان کو خراج تحسین

اسلام آباد (اُردو پوائنٹ اخبارتازہ ترین - این این آئی۔ 24 جولائی2024ء) تحریک دفاع حرمین شریفین کے زیر اہتمام سعودی خدمات اور حج کے حوالے سے منعقدہ کانفرنس کے شرکا نے کہا ہے کہ پاکستانی قوم، علما و مشائخ و سیاسی عمائدین خراب ترین موسم کے باوجود بہترین حج انتظامات پر خادم الحرمین الشریفین شاہ سلمان بن عبدالعزیز، ولی عہد محمد بن سلمان بن عبدالعزیز اور سفیر نواف بن سعید المالکی کو خراج تحسین پیش کرتے ہیں، سعودی حکومت حجاج اور معتمرین کی خدمت کے لیے بہترین اقدامات کررہی ہے۔

مقررین نے ان خیالات کا اظہار تحریک دفاع حرمین شریفین کے زیر اہتمام اسلام آباد میں سعودی حج انتظامات بارے منعقدہ سیمینار سے خطاب کرتے ہوئے کیا۔ مہمان خصوصی سعودی عرب کے پاکستان میں سیاسی امور کے مسول صالح المطیری تھے۔

(جاری ہے)

جبکہ میزبان سیکرٹری جنرل تحریک دفاع حرمین شریفین مولانا فضل الرحمان خلیل تھے۔ سابق ڈپٹی چیرمین سینٹ اور ممبر قومی اسمبلی مولانا عبدالعفور حیدری، میزبان سیکرٹری جنرل تحریک دفاع حرمین مولنا فضل الرحمان خلیل، ایم کیو ایم کے مصطفی کمال، وزیر اطلاعات آزاد جموں و کشمیر پیر مظہر سعید شاہ، ممتاز صحافی سلیم صافی، پیر چورہ شریف سید سعادت علی شاہ، مولانا سعید یوسف، صاحبزادہ سعید الرشید عباسی ،مولانا عتیق الرحمن شاہ کاشمیری، پروفیسر سجاد قمر، حافظ مقصود احمد، مولنا عبدالمجید ہزاروی نے خطاب کیا۔

ممبر قومی اسمبلی مولانا عبدنالغفور حیدری نے کانفرنس سے خطاب کرتے ہوئے کہا کہ سعودی حکومت کا اتنے سخت موسم میں بہترین حج انتظامات کرنا قابل تحسین ہے۔اور ہم بہترین مہمان نوازی پر خادم الحرمین الشریفین ، ولی عہد اور حکومت رشیدہ کے مشکور ہیں۔ایک طبقے نے بے بنیاد پروپیگنڈہ کیا جس کا حقیقت سے کوئی تعلق نہیں ہے۔ سعودی حکومت نے ثابت کیا ہے کہ وہ حرمین شریفین کے متولی ہونے کے بھرپور حقدار ہیں ۔

انہوں نے کہا کہ پاکستان سعودی دوستی لازوال ہے اور رہے گی۔ سیکرٹری جنرل تحریک دفاع حرمین شریفین مولانا فضل الرحمان خلیل نے کہا کہ سعودی عرب پوری دنیا کے مسلمانوں کا محسن ہے۔ اور سعودی حکومت نے اپنے ہر عمل سے ثابت کیا ہے کہ وہ حرمین شریفین کے بہترین متولی ہیں۔پاکستان کی پوری قوم علما و مشایخ سعودی حکومت کے شانہ بشانہ ہیں۔ پاکستان اور سعودی تعلقات کی مزید بہتری کے لیے میڈیا اور عوامی سفارت کاری کے ذریعے دو طرفہ تعلقات کے مثبت بیانیے کو فروغ دیا جائے گا۔

پاکستان اور سعودی عرب یک جان اور دو قالب ہیں۔ اور رہیں گے۔ کانفرنس میں سینٹر حافظ عبدالکریم اور صدر تحریک دفاع حرمین شریفین مولانا علی محمد ابو تراب کا پیغام بھی پیش کیا گیاصاحبزادہ شاہ اویس نورانی نے کہا کہ سعودی حکومت نے حجاج اور معتمرین کیلئے ہر سال کی طرح اس سال بھی بہترین انتظامات کیے۔ سعودی حکومت نے جو سہولیات فراہم کی ہیں ان کی پوری دنیا میں کوئی مثال نہیں ملتی۔

ایک عام آدمی سے لے کر سربراہان مملکت تک کے لیے انتظامات کیے جاتے ہیں۔ پاکستان کے علمائے کرام نے عالم اسلام کے اتحاد و اتفاق کے لیے لازوال کردار ادا کیا ہے۔انہوں نے کہا کہ جو عناصر شرپسندی پھیلانا چاہتے ہیں ان کو قلع قمع کیا جانا ریاست کے استحکام کے لیے ضروری ہے۔ایم کیو ایم کے مصطفی کمال نے کہا کہ حج ایک مقدس فریضہ ہے اور اس کے لیے سعودی حکومت کے انتظامات کو ہم خراج تحسین پیش کرتے ہیں۔

پروفیسر سجاد قمر نے کہا کہ اس سال سعودی حکومت کا سب سے اچھا کارنامہ مریضوں کو ایمبولینس پر حج کروانا ہے۔ پاکستان میں سعودی عرب کے سفیر نواف بن سعید المالکی نے روڈ مکہ کے حوالے سے اہم کردار ادا کیا اور پاکستان کے حجاج کو یہاں پر ہی ایمیگریشن کی سہولت فراہم کی گئی۔ پاکستان کے عوام جناب نواف بن سعید المالکی کے مشکور ہیں۔ مولانا عتیق الرحمان کاشمیری نے کہا کہ تحریک دفاع حرمین شریفین پاکستان اور سعودی تعلقات کی مضبوطی کی ترجمان ہے۔