شہید اسماعیل ہنیہ کا خون رائیگاں نہیں جائے گا،مولانا فضل الرحمن

مرحوم کی شہادت سے فلسطین کی جدوجہد آزادی کو تقویت ملے گی،فلسطینی عوام اورامت مسلمہ کسی صورت مسجد اقصی اور فلسطین کی آزادی سے دستبردار نہیں ہونگے، حماس کے رہنمائوں سے گفتگو

ہفتہ 3 اگست 2024 18:02

شہید اسماعیل ہنیہ کا خون رائیگاں نہیں جائے گا،مولانا فضل الرحمن

دو حہ(اُردو پوائنٹ اخبارتازہ ترین - این این آئی۔ 03 اگست2024ء) جمعیت علمائے اسلام (ف) کے سربراہ مولانا فضل الرحمن نے کہاہے کہ شہید اسماعیل ھنیئہ کا خون رائیگاں نہیں جائے گا،مرحوم کی شہادت سے فلسطین کی جدوجہد آزادی کو تقویت ملے گی،فلسطینی عوام اورامت مسلمہ کسی صورت مسجد اقصی اور فلسطین کی آزادی سے دستبردار نہیں ہونگے۔سربراہ جمعیت علما ئے اسلام (ف) مولانا فضل الرحمان گذشتہ شب جدہ سے سیدھا قطر پہنچے۔

مولانا فضل الرحمان نے گذشتہ رات پہنچتے ہی قطر میں فلسطین اور حماس کے رہنمائوں سے ملاقات کی۔جے یوآئی سربراہ مولانا فضل الرحمان نے ہفتہ کی صبح وفد کے ہمراہ حماس رہنما خالد مشعل سے ملاقات کر کے جمعیت علما اسلام اور پاکستان کی عوام کی جانب سے اسماعیل ھنیئہ کی شھادت پر تعزیت کی۔

(جاری ہے)

مولانا فضل الرحمن نے شھدا غزہ کیلئے فاتحہ خوانی اور دعا کی۔

مولانا فضل الرحمان کے حکم پرگذشتہ روز ملک بھر میں اسماعیل ھنیئہ کی شھادت پر اسرائیل کے خلاف بھرپور مظاہرے کئے گئے۔مولانا فضل الرحمان کے حکم پر جے یو آ کے ممبران نے قومی اسمبلی ،سینیٹ ،کے پی اور بلوچستان اسمبلی میں قراردادیں بھی پیش کی ہیں۔مولانا فضل الرحمان کی ہدایت پر شہید اسماعیل ہنیہ کے لئے ملک بھر کے مساجد اور مدارس میں قرآن خوانیاں بھی کی گئیں۔

انہوںنے کہاکہ شہید اسماعیل ھنیئہ کا خون رائیگاں نہیں جائے گا،مرحوم کی شہادت سے فلسطین کی جدوجہد آزادی کو تقویت ملے گی۔انہوںنے کہاکہ شہید اسماعیل ہنیہ کی شہادت پر پورا عالم اسلام افسردہ ہے۔ مولانا فضل الرحمن نے کہاکہ مسجد اقصی کو صیہونی غاصبوں سے آزاد کرنا مسلمانوں پر فرض ہے،حماس رہنمائوں کے حوصلے بھت بلند تھے۔انہوںنے کہاکہ فلسطینی عوام اورامت مسلمہ کسی صورت مسجد اقصی اور فلسطین کی آزادی سے دستبردار نہیں ہونگے۔

انہوںنے کہاکہ جے یوآئی اور پوری پاکستانی قوم فلسطینیوں کی جدوجہد آزادی میں ان کے شانہ بشانہ ہیں۔ انہوںنے کہاکہ دعا ہے کہ اللہ کریم مرحوم کی شہادت کو قبول فرمائے اور ان کو اپنے شایان شان جزا عطا فرمائے۔انہوںنے کہاکہ اللہ کریم لواحقین کو صبر جمیل عطا فرمائے۔مولانا فضل الرحمان کے ہمراہ علامہ راشد محمود سومرو اور مفتی ابرار احمد بھی وفد میں شامل تھے۔