نیو کراچی ٹاؤن میں 10 روزہ شجر کاری مہم کامیابی کی طرف گامزن

کراچی (اُردو پوائنٹ اخبارتازہ ترین - این این آئی۔ 03 اگست2024ء) نیو کراچی ٹاؤن میں 10 روزہ شجر کاری مہم کامیابی کی طرف گامزن ہے ۔اس شجر کاری مہم کے دوران نیو کراچی ٹاؤن میں ہزاروں پودے لگائے جائیں گے۔ ان خیالات کا اظہار چیئرمین نیو کراچی ٹاؤن محمد یوسف نے نارتھ کراچی یوپی موڑ پر قائم گرین بیلٹ پر پودا لگانے کے بعد میڈیا سے گفتگو کرتے ہوئے کیا ۔

اس موقع پر میونسپل کمشنر نیو کراچی ٹاؤن ایاز حمید اللہ بلوچ،وائس چیئرمین نیو کراچی ٹاؤن شعیب بن ظہیر ،پارک کمیٹی نیو کراچی ٹاؤن کے انچارج عمران فقیر ،ایڈیشنل ڈائریکٹر سینی ٹیشن مُشتاق خان ،ڈائریکٹر باغات آفتاب احمد،ڈپٹی ڈائریکٹر باغات جاوید جمال،محکمہ ایم اینڈ ای کے انچارج سید واجدعلی و دیگر بلدیاتی افسران بھی موجود تھے۔

(جاری ہے)

چیئرمین نیو کراچی ٹاؤن محمد یوسف نے افسران سے بات چیت کرتے ہوئے کہا کہ نیو کراچی ٹاؤن انشاء اللہ بہت جلد خوبصورت ٹاؤن میں شمار ہوگا جس کے لئے نیو کراچی ٹاؤن کی انتظامیہ منتخب بلدیاتی نمائندوں کے ساتھ ہمہ وقت کھڑی ہے اور جماعت اسلامی کے منتخب نمائندے انقلابی سوچ کے ساتھ نیو کراچی ٹاؤن کو پھر سے بحال کررہے ہیں ،انہوں نے کہا کہ نیو کراچی ٹاؤن کے اجڑے ہوئے پارکوں کے تزین و آرائش کے بعد بحال کیا جارہا ہے اس سلسلے میں اب تک تقریباً آٹھ پارکوں کو بحال کرکے عوام کے لئے کھولے جاچکے ہیں جبکہ ابھی 12 پارکوں کی بحالی کا کام تیزی سے جاری ہے جو انشاء اللہ جلد مکمل ہوجائے گا ۔

انہوں نے مزید کہا کہ شجر کاری کے زریعے نیو کراچی ٹاؤن کو ہرا بھرا کررہے ہیں اور ان کی حفاظت کے لئے عوامی سطح پر آگاہی مہم جاری ہے درختوں کے فوائد بہت زیادہ ہیں یہ درخت سایہ فراہم کرنے کے ساتھ ماحولیاتی آلودگی کو کم کرنے میں معاون ثابت ہوتے ہیں اور انسان دوست ماحول فراہم کرتے ہیں ۔