ریاست بھر کی طرح نیلم میں بھی ’’یوم استحصال کشمیر‘‘ کے موقع پر مختلف مقامات پر احتجاجی مظاہرے، ریلیاں نکالی گئیں

نیلم (اُردو پوائنٹ اخبارتازہ ترین - اے پی پی۔ 05 اگست2024ء) ریاست بھر کی طرح نیلم میں بھی ’’یوم استحصال کشمیر‘‘ کے موقع پر مختلف مقامات پر احتجاجی مظاہرے، ریلیاں نکالی گئیں۔ یوم استحصال کشمیر“ کے موقع پرضلع بھر میں ہندوستان کی آئینی دہشتگردی کے خلاف شٹرڈاؤن ہڑتال ،احتجاجی مظاہرے اور ریلیاں نکالی گئیں، مظاہرین نے بھارت کے مقبوضہ کشمیر پر غاصبانہ قبضے کے خلاف فلک شگاف نعرے لگائے،مظاہروں میں سول سوسائٹی ،سیاسی و سماجی حلقوں سمیت طلباء کی بڑی تعداد نے شرکت کی۔

اس سلسلے میں سول سوسائٹی اور ضلعی انتظامیہ کے اشتراک سے مرکزی تقریب ڈسٹرکٹ ہیڈکوارٹرز آٹھمقام میں ہوئی۔ تقریب کا آغاز صبح 9:00 بجے سائرن بجا کر ایک منٹ کی خاموشی سے کیا گیا،جس کے بعد ہندوستان کے 5 اگست کے غیر قانونی اقدامات کے خلاف احتجاجی ریلی نکالی گئی۔

(جاری ہے)

ریلی کی قیادت ڈپٹی کمشنر ندیم احمدجنجوعہ، چیئرمین ضلع کونسل غلام مجتبیٰ مغل اور دیگر کر رہے تھے۔

ریلی کے شرکاء نے بھارت کے مقبوضہ کشمیر پر غیر قانونی قبضے اور 05اگست کی آئینی دہشتگردی کو مسترد کرتے ہوئے بھارت کے خلاف اور تحریک آزادی کشمیر کے حق میں شدیدنعرے بازی کی۔ احتجاجی ریلی میں ضلعی انتظامیہ، مقامی منتخب نمائندگان، انجمن تاجران، وکلاء، صحافی، سول سوسائٹی، طلبا اور عوام کی کثیر تعداد نے شرکت کی۔ ریلی ڈسٹرکٹ ہیڈ کوارٹرز آٹھمقام سے آزادی چوک سے ہوتی ہوئی پرانے لاری اڈے کے مقام پر جلسہ کی شکل اختیار کر گئی۔

ڈپٹی کمشنر ندیم احمد جنجوعہ نے شرکاء کا بڑی تعداد میں احتجاجی ریلی میں شرکت پر شکریہ ادا کرتے ہوئے کہا کہ 05اگست 2019کو ہندوستان کی جانب سے آرٹیکل 370اور 35A معطل کر کے مقبوضہ کشمیر کی خصوصی حیثیت کے خاتمے اور جغرافیائی ہیئت کو تبدیل کرنے کی کوشش کو ہم کشمیری مسترد کرتے ہیں اور اقوام عالم سے یہ مطالبہ کرتے ہیں کہ کشمیریوں سے اقوام متحدہ کی قراردادوں کی روشنی میں کئے گئے وعدوں کو پورا کیا جائے۔

انہوں نے کہا کہ کشمیریوں کے مستقبل کا فیصلہ اقوام متحدہ کی قراردادوں کے مطابق استصواب رائے کے ذریعے ہی ممکن ہے۔ چیئرمین ضلع کونسل غلام مجتبیٰ مغل نے کہا کہ ہندوستان اوچھے ہتھکنڈوں سے کشمیریوں کے جذبہ حریت کو نہیں دبا سکتا،بہادر کشمیری ہندوستان کے 05 اگست کے غیر قانونی اقدامات کو مسترد کرتے ہیں۔ انہوں نے کہا کہ مسئلہ کشمیر کے حل کے بغیر دنیا بالخصوص جنوبی ایشیا میں امن قائم نہیں ہو سکتا، عالمی دنیا کشمیریوں کے بنیادی حق’’حق خود ارادیت“ سے راہ فرار اختیار نہیں کر سکتی۔

اس موقع پر صدر انجمن تاجران عبدالرشید اعوان، صدر غیر جریدہ ملازمین نیلم جاوید چوہدری،عنایت اللہ قاسمی رہنما جماعت اسلامی، راجہ افتخارڈسٹرکٹ کونسلر و صدر پرائیویٹ ٹورازم ایسوسی ایشن، ڈسٹرکٹ کونسلر سید ثقلین فدا کاظمی، ممتاز لیگی رہنما خواجہ عبد الشکور بانڈے، ڈسٹرکٹ کونسلر لیاقت خان، بشارت احمد میر ایڈووکیٹ سابق صدر بار ایسوسی ایشن، لوکل کونسلر و سابق چیئرمین بلدیہ سید تجمل حسین و دیگر نے بھارت کی جانب سے 5اگست 2019 کی آئینی دہشتگردی کو مسترد کرتے ہوئے تحریک آزادی کشمیر کو اپنے منطقی انجام تک پہنچانے کیلئے اپنی جدوجہد کو جاری رکھنے کا عزم کیا۔