پنجاب بھر میں 18اگست تک مزید مون سون بارشوں کی پیشگوئی

آئندہ 24گھنٹوں میں پنجاب کے بیشتر اضلاع میں آندھی ،گرج چمک کے ساتھ بارش کے امکانات

جمعرات 15 اگست 2024 14:53

لاہور (اُردو پوائنٹ اخبارتازہ ترین - این این آئی۔ 15 اگست2024ء) پنجاب بھر میں 18اگست تک مزید مون سون بارشوں کی پیشگوئی کر دی گئی ۔ترجمان پی ڈی ایم اے کے مطابق گزشتہ 24گھنٹوں میں جہلم 30 ملی میٹر، منگلا 25جبکہ سیالکوٹ اور گجرانوالہ میں 19 ملی میٹر بارش ریکارڈ کی گئی۔آئندہ 24گھنٹوں میں پنجاب کے بیشتر اضلاع میں آندھی اور گرج چمک کے ساتھ بارش کے امکانات ہیں۔

لاہور ، گجرانوالہ، راولپنڈی ،سرگودھا، ملتان، ڈیرہ غازی خان، بہاولپور ، فیصل آباد، ساہیوال اور گجرات ڈویژنز میں مون سون بارشیں متوقع ہیں۔موسمی صورتحال کے بارے صوبے بھر کی انتظامیہ کو الرٹ جاری کر دیا ہے۔ڈی جی پی ڈی ایم اے عرفان علی کاٹھیا نے کہا کہ وزیر اعلی پنجاب کی ہدایات کے پیش نظر محکمے الرٹ رہیں ،اربن فلڈنگ کے خدشے کے پیش نظر پیشگی انتظامات مکمل کرے۔

(جاری ہے)

پی ڈی ایم اے کی جانب سے کمشنرز، ڈی سیز ،واسا، محکمہ آبپاشی، ریسکیو، سول ڈیفنس اور دیگر متعلقہ محکموں کو الرٹ رہنے کی ہدایت کی گئی ہے ۔ ڈی جی عرفان کاٹھیا نے کہا کہ پی ڈی ایم اے کنٹرول روم میں 24گھنٹے صورتحال کی مانیٹرنگ ہو رہی ہے، عوام الناس سے التماس ہے کہ حکومتی ہدایات پر عملدرآمد یقینی بنائیں۔ پرانی عمارتوں کھمبوں اور آسمانی بجلی کی گرج چمک سے بچائو کیلئے محفوظ مقامات پر رہیں۔خراب موسم کی صورتحال میں غیر ضروری سفر سے گریز کریں ، ہنگامی صورتحال میں پی ڈی ایم اے کی ہیلپ لائن 1129 پر کال کریں۔