سٹیج، ٹی وی، فلم انڈسٹری کے معروف اداکار عابد خان مرحوم کی برسی کل منائی جائے گی

پیر 19 اگست 2024 16:30

فیصل آباد (اُردو پوائنٹ اخبارتازہ ترین - اے پی پی۔ 19 اگست2024ء) سٹیج، ٹی وی، فلم انڈسٹری کے معروف اداکار عابد خان مرحوم کی24ویں برسی کل 20اگست بروزمنگل کوعقیدت و احترام سے منائی جائیگی۔ اداکار و فنکار عابد خان کا شمار ملک کے معروف مزاحیہ فنکاروں میں ہوتا تھا۔ انہیں شروع سے ہی مزاح پر بھر پور عبور حاصل تھا جس کے باعث و ہ دوستوں کی سنگت میں بہت ہر دلعزیز تھے۔

وہ جہاں بھی موجود ہوتے وہاں محفل قہقہوں کی آوازوں سے گونجتی اور کشت زعفران بنی رہتی۔

(جاری ہے)

اپنی اسی خداداد فنی صلاحیت کے باعث انہوں نے باقاعدہ طور پر سٹیج کی دنیا میں قدم رکھا۔ انہوں نے اپنے طویل فنی سفرکے دوران سینکڑوں سٹیج ڈراموں، کئی ٹی وی پروگرامات اور فلموں میں بھی اپنی اداکاری کے جوہر دکھائے وہ بطور میزبان ٹی وی پر کئی پنجابی پروگرام بھی کر چکے ہیں۔

عابد خان مرحوم جتنے اچھے فنکار تھے اتنے ہی اچھے انسان بھی تھے۔عابد خان کو 20اگست 2000میں اسلام آباد پرفارمنس کیلئے موجودگی کے دوران اچانک دل کا شدید دورہ پڑا اور وہ اپنے مالک حقیقی سے جا ملے۔ مرحوم کی برسی کے موقع پر ان کے صاحبزادے حسن عابد اور دیگر پرستاروں کی جانب سے فاتحہ اور قرآن خوانی کا بھی اہتمام کیا جائے گا۔