کراچی میں وسطِ ستمبر تک بارش کا امکان نہیں: محکمہ موسمیات

کراچی میں ستمبر گرم گزرتا ہے، اکتوبر میں بھی موسم گرم اور خشک رہنے کا امکان ہے‘چیف میٹرولوجسٹ

جمعرات 5 ستمبر 2024 22:30

کراچی (اُردو پوائنٹ اخبارتازہ ترین - آن لائن۔ 05 ستمبر2024ء) چیف میٹرولوجسٹ سردار سرفراز کا کہنا ہے کہ کراچی میں وسطِ ستمبر تک بارش کا کوئی امکان نہیں، بارش سے متعلق فی الحال پیش گوئی نہیں کی جا سکتی۔انہوں نے بتایا ہے کہ سندھ کے علاقے تھر پارکر، عمر کوٹ اور ملحقہ علاقوں میں آج اور کل ہلکی بارش ہو سکتی ہے، مون سون ہوائیں وسطِ ستمبر سے سندھ سے واپس لوٹنے لگتی ہیں۔

(جاری ہے)

چیف میٹرولوجسٹ سردار سرفراز نے بتایا کہ کراچی میں ستمبر گرم گزرتا ہے، اکتوبر میں بھی موسم گرم اور خشک رہنے کا امکان ہے۔چیف میٹرولوجسٹ نے یہ بھی بتایا کہ اکتوبر میں ہیٹ ویوز کا بھی امکان ہوتا ہے۔دوسری جانب محکمہ موسمیات کے مطابق کراچی میں آئندہ 24 گھنٹوں کے دوران مطلع جزوی ابر آلود اور موسم مرطوب رہنے کا امکان ہے۔شہر میں گزشتہ 24 گھنٹوں کے دوران کم سے کم درجہ حرارت 27.5 ڈگری سینٹی گریڈ ریکارڈ ہوا جبکہ زیادہ سے زیادہ 32 سے 34 ڈگری سینٹی گریڈ تک رہنے کا امکان ہے۔کراچی میں جنوب مغرب کی سمت سے 19 کلو میٹر فی گھنٹہ کی رفتار سے ہوائیں چل رہی ہیں جن میں نمی کا تناسب 81 فیصد ہے۔