مولانا کی ہمیں ضرورت نہیں، تاریخی لحاظ سے فضل الرحمان کسی کے ساتھ نہیں اپنے ساتھ ہوتے ہیں، یہ وہیں کھڑے ہوں گے جہاں فائدہ نظر آتا ہوگا، بیرسٹر سیف

اتوار 8 ستمبر 2024 11:30

پشاور(اُردو پوائنٹ اخبارتازہ ترین - این این آئی۔ 08 ستمبر2024ء) خیبر پختونخوا کے وزیراعلیٰ علی امین گنڈا پور کے مشیر برائے اطلاعات بیرسٹر سیف نے کہا ہے کہ جمعیت علمائے اسلام کے سربراہ مولانا فضل الرحمان کی ہمیں نہ کل ضرورت تھی نہ آج ہے۔نجی ٹی وی کے پروگرام میں گفتگو کرتے ہوئے بیرسٹر سیف کا کہنا تھاکہ تاریخی لحاظ سے دیکھا جائے تو مولانا فضل الرحمان کسی کے ساتھ نہیں اپنے ساتھ ہوتے ہیں، وہ وہیں کھڑے ہوں گے جہاں اپنا فائدہ نظر آتا ہوگا۔

انہوں نے کہا کہ مولانا فضل الرحمان اگراپنی سوچ بدل چکے اور مفاد حکومت کے ساتھ ہونے میں نظرآرہا ہے تو انہیں مبارک، ان کی تحریک اس حد تک ہے خیبرپختونخوا سے تو خاتمہ ہوچکا ہے، کے پی میں مولانافضل الرحمان کی اتنی سیٹیں ہیں کہ ساری اپوزیشن کو ملا کر بھی اسمبلی اجلاس نہیں بلاسکتے۔

(جاری ہے)

ان کا کہنا تھاکہ مولانا کو کے پی کی گورنری اور سینیٹ کی دو سیٹوں پر نظر ہے تو شہباز شریف اور زرداری دے دیں گے، انہوں نے مؤقف اس لیے تبدیل کیا کہ ذاتی مفاد نظر آرہا ہے، مولانا فضل الرحمان اپنے خاندان سے باہر سیاست کو دیکھتے ہی نہیں۔

بیرسٹر سیف کا مزید کہنا تھاکہ مولانا فضل الرحمان کا بھائی سینیٹر بنے گا یا ان کا داماد یا سمدھی گورنر بنے گا۔ترجمان پختونخوا حکومت نے کہا کہ مولانا کی ہمیں نہ کل ضرورت تھی نہ آج ہے، الیکشن کمیشن پر اور 8 فروری الیکشن پر مولانا کے اعتراض پر ہم ساتھ تھے، انہوں نے اب اس نظام کو ہی قبول کرلیا ہے۔