بلاول بھٹو زرداری کی این اے 171 رحیم یار خان کے ضمنی انتخاب میں مخدوم طاہر رشید الدین کی شاندار کامیابی پر مبارکباد

پیپلز پارٹی ایک خوشحال اور متحد پاکستان کی جدوجہد جاری رکھے گی، جہاں ہر شہری کو انصاف، مواقع اور وقار تک رسائی حاصل ہو،چیئرمین پیپلزپارٹی

جمعہ 13 ستمبر 2024 13:01

بلاول بھٹو زرداری کی این اے 171 رحیم یار خان کے ضمنی انتخاب میں مخدوم ..

کراچی(اُردو پوائنٹ اخبارتازہ ترین - این این آئی۔ 13 ستمبر2024ء) پاکستان پیپلز پارٹی کے چیئرمین بلاول بھٹو زرداری نے این اے 171 رحیم یار خان کے ضمنی انتخاب میں مخدوم طاہر رشید الدین کی شاندار کامیابی پر مبارکباد دی ہے۔ میڈیا سیل بلاول ہاس سے جاری بیان میں، چیئرمین پی پی پی نے اس کامیابی پر اظہارِ مسرت اور رحیم یار خان کے عوام کا شکریہ ادا کرتے ہوئے کہا کہ رحیم یار خان کی عوام نے پاکستان پیپلز پارٹی کی قیادت پر اعتماد کیا۔

انہوں نے پی پی پی کارکنان، مقامی قیادت اور حامیوں کا بھی شکریہ ادا کیا جن کی انتھک محنت سے یہ کامیابی ممکن ہوئی۔ انہوں نے کہا کہ یہ فتح اس بات کی عکاسی کرتی ہے کہ پی پی پی کے ترقی پسند، شمولیتی اور جمہوری پاکستان کے وژن کو بھرپور عوامی اعتماد و حمایت حاصل ہے۔

(جاری ہے)

چیئرمین بلاول بھٹو زرداری نے کہا کہ مخدوم طاہر رشید الدین کی کامیابی نہ صرف پارٹی کے لیے بلکہ رحیم یار خان کے عوام کے لیے بھی ایک جیت ہے، جنہوں نے پسماندگی کی بجائے ترقی اور کھوکھلے وعدوں کی بجائے حقیقی خدمت کا انتخاب کیا۔

انہوں نے مزید کہا کہ یہ مینڈیٹ ہمیں یاد دلاتا ہے کہ ہمیں ایمانداری، دیانتداری اور شفافیت کے ساتھ عوام کی خدمت کرنی ہے۔چیئرمین بلاول بھٹو زرداری نے عوام کی ضروریات کو پورا کرنے، بہتر حکمرانی کو یقینی بنانے اور جمہوری اصولوں کی پاسداری پر زور دیتے ہوئے اس بات کا اعادہ کیا کہ پاکستان پیپلز پارٹی ایک خوشحال اور متحد پاکستان کی جدوجہد جاری رکھے گی، جہاں ہر شہری کو انصاف، مواقع اور وقار تک رسائی حاصل ہو۔