این اے 171 کے ضمنی الیکشن کا غیرحتمی وغیرسرکاری نتیجہ، پی پی امیدوارکامیاب

جمعہ 13 ستمبر 2024 13:04

رحیم یارخان (اُردو پوائنٹ اخبارتازہ ترین - این این آئی۔ 13 ستمبر2024ء) قومی اسمبلی کے حلقہ این اے 171 رحیم یار خان کے ضمنی الیکشن کا غیر حتمی اور غیر سرکاری نتیجہ آگیا جس کے مطابق پیپلز پارٹی کے امیدوار مخدوم طاہر رشید الدین نے میدان مار لیا ہے۔ضمنی انتخاب میں تمام پولنگ اسٹیشنز کے غیر حتمی اور غیر سرکاری نتیجے کے مطابق پیپلز پارٹی کے مخدوم طاہر رشید ایک لاکھ 16 ہزار 429 ووٹ لے کر کامیاب ہوئے۔

پاکستان تحریک انصاف کے حسان مصطفیٰ نے 58 ہزار 251 ووٹ حاصل کیے۔

(جاری ہے)

ضمنی الیکشن میں پولنگ کا عمل صبح 8 سے شام 5 بجے تک بغیر کسی وقفے کے جاری رہا، این اے 171 سے پیپلز پارٹی کے مخدوم طاہر اور پی ٹی آئی کے حسان مصطفیٰ کے درمیان کانٹے کے مقابلے کی توقع تھی۔ اسی حلقے میں 4 دیگر آزاد امیدوار بھی انتخابی میدان میں تھے جبکہ حلقے میں کٴْل ووٹرز کی تعداد 5 لاکھ 26 ہزار 973 ہے۔واضح رہے کہ حلقے میں 301 پولنگ اسٹیشن موجود تھے جن کی سیکیورٹی کیلئے 2700 پولیس اہلکار تعینات کیے گئے تھے۔یہ نشست پی ٹی آئی کے ایم این اے ممتاز مصطفیٰ کے انتقال کے باعث خالی ہوئی تھی۔