سی ٹی ڈی کی دہشتگردوں کے خلاف کارروائی، کالعدم تنظیموں کے 9 مبینہ دہشت گرد گرفتار، اسلحہ و بارودی مواد برآمد،ترجمان

لاہور (اُردو پوائنٹ اخبارتازہ ترین - اے پی پی۔ 14 ستمبر2024ء) کائونٹر ٹیررازم ڈیپارٹمنٹ(سی ٹی ڈی)پنجاب نے دہشت گردی کا بڑا منصوبہ ناکام بناتے ہوئے مختلف آپریشنز کے دوران کالعدم تنظیموں کے 9مبینہ دہشتگردوں کو گرفتار کر لیا۔ترجمان کے مطابق سی ٹی ڈی پنجاب نے دہشت گردی کے کسی بھی ناخوشگوار واقعہ سے موثر طریقے سے نمٹنے کے لیے صوبہ بھر کے مختلف اضلاع میں 71خفیہ آپریشنز کئے جن کے دوران 69مشتبہ افراد سے پوچھ گچھ کی گئی اورکالعدم تنظیموں کے 9مبینہ دہشت گردوں کو گرفتارکر کے ان کے قبضہ سے اسلحہ ،دھماکہ خیز و دیگر ممنوعہ مواد برآمد کر لیاگیا۔

گرفتار ہونے والے دہشت گردوں میں عبدالکریم، محمد عثمان ، عمران صدیقی، محمد ثانی ، مستجاب حسین شاہ ،شوکت اللہ ،احمد خان ، شیراز محمود اور سعید الرحمان شامل ہیں جن کا تعلق سپاہ صحابہ پاکستان 'لشکر جھنگوی اور داعش سے ہے جبکہ ان مبینہ دہشتگردوں کی گرفتاری رحیم یار خان ،اوکاڑہ، بہاولپور ، لاہور ، راولپنڈی ،فیصل آباد اور میانوالی میں انٹیلی جنس بیسڈ آپریشن کے دوران عمل میں لائی گئی۔

(جاری ہے)

ترجمان نے بتایا کہ دہشتگردوں کے قبضے سے دھماکہ خیز مواد 4895گرام، ہینڈ گرنیڈ 2، آئی ای ڈی بم 2، ڈیٹونیٹرز 26، حفاظتی فیوز وائر 73فٹ، 30 بور کا پستول بمعہ گولیاں، کالعدم تنظیم کے پمفلٹس 17، ممنوعہ رسالے 7، ممنوعہ کتب 15، اسٹیکرز 156، رسید بکس 4، موبائل فونز 2 اور 99660روپے نقدی برآمد کی گئی ہے۔ترجمان نے کہاکہ دہشت گردوں نے تخریب کاری کا منصوبہ بنا رکھا تھا اور وہ دہشتگردانہ کاروائی میں اہم تنصیبات کو ٹارگٹ کرنا چاہتے تھے،گرفتار مبینہ دہشت گردوں کے خلاف مقدمات درج کر کے تفتیش کے لئے نامعلوم مقام پر منتقل کر دیا گیا ہے۔

ترجمان نے مزید کہا کہ رواں ہفتے کے دوران مقامی پولیس اور سکیورٹی اداروں کی مدد سے سی ٹی ڈی پنجاب نے 978کومبنگ آپریشنز کیے جن کے دوران 34694افراد کو چیک کیا گیا، 34694مشتبہ افراد کو گرفتار ،79ایف آئی آر ز کا اندراج جبکہ 63بازیابیاں کی گئیں۔انہوں نے کہا کہ سی ٹی ڈی پنجاب پوری مستعدی سے محفوظ پنجاب کے اپنے ہدف پر عمل پیرا ہے اوردہشت گردی کے ناسور کو جڑ سے اکھاڑ پھینکنے کے لیے پرعزم ہے،دہشت گردوں اور ریاست دشمن عناصر کو سلاخوں کے پیچھے پہنچانے کی کوششوں میں کوئی کسر نہیں چھوڑی جائے گی۔انہوں نے کہا کہ دہشت گردی سے متعلق کسی بھی معلومات کی صورت میں سی ٹی ڈی پنجاب کی ہیلپ لائن 0800-11111پر اطلاع کی جائے۔