آیت اللہ حافظ ریاض نجفی کی سیدحسن نصر اللہ کی اسرائیلی حملے میں شہادت پر افسوس کا اظہار ،شدید مذمت

ٌ شہید قدس کا خلا پورا نہیں کیا جا سکے گا، عالم اسلام ایک مجاہد عالم دین سے محروم ہو گیا ہے حسن نصر اللہ کی شہادت بڑا نقصان ، لیکن فلسطین کی آزادی کی تحریک رکے گی نہیں، صدر وفاق المدارس الشیعہ

ہفتہ 28 ستمبر 2024 19:30

;لاہور (اُردو پوائنٹ اخبارتازہ ترین - آن لائن۔ 28 ستمبر2024ء) وفاق المدارس الشیعہ پاکستان کے صدرآیت اللہ حافظ سیدریاض حسین نجفی ،سیکرٹری جنرل علامہ محمد افضل حیدری اور نائب صدر علامہ مرید حسین نقوی نے حزب اللہ لبنان کے سربراہ حجة الاسلام والمسلمین سیدحسن نصر اللہ رحمة اللہ علیہ کی اسرائیل کے حملے میں شہادت پر افسوس کا اظہار اور امریکی سرپرستی میں ہونے والے حملے کی شدید مذمت کرتے ہوئے کہا ہے کہ شہید قدس کا خلا پورا نہیں کیا جا سکے گا۔

عالم اسلام ایک مجاہد عالم دین سے محروم ہو گیا ہے۔

(جاری ہے)

ہم رہبر معظم آیت اللہ علی خامنہ ای، حزب اللہ کے کارکنان و رہنما اور شہید مقاومت کے خانوادے سے اظہار تعزیت کرتے ہیں۔ میڈیا سیل کی طرف سے جاری بیان میں حافظ ریاض نجفی نے کہا کہ سید حسن نصراللہ اپنے جد امجد حضرت امام حسین علیہ السلام کے نقش قدم پر چلتے ہوئے شہادت کے درجے پر فائز ہوئے ہیں۔ان شاء اللہ شہید کا خون بیت المقدس کی آزادی کا موجب بنے گا ۔کوئی شک نہیں کہ قاسم سلیمانی، اسماعیل ہنیہ کی شہادت کے واقعہ کے بعد تحریک ازادی قدس کو حسن نصر اللہ کی شہادت سے ایک بڑا نقصان ہوا ہے ۔ لیکن فلسطین کی آزادی کی تحریک رکے گی نہیں ۔ ہم دعا گو ہیں اور امید کرتے ہیں کہ مجاہدین فلسطین کوجلد آزادی کی خوشخبری ملے گی۔