ڈاکٹر رمیش کمار کے گھر پر احتجاج،دو سابق پی ٹی آئی ایم پی ایز بری

پیر 28 اکتوبر 2024 21:20

کراچی(اُردو پوائنٹ اخبارتازہ ترین - این این آئی۔ 28 اکتوبر2024ء) کراچی کی سٹی کورٹ نے تحریکِ انصاف کے منحرف رکن ڈاکٹر رمیش کمار کے گھر پر احتجاج کے کیس میں پی ٹی آئی کے 2 سابق ایم پی ایز سمیت 5 ملزمان کی بریت کی درخواست منظور کر لی۔عدالت نے سعید آفریدی، شاہنواز جدون سمیت 5 ملزمان کو مقدمے سے بری کر دیا۔

(جاری ہے)

ملزمان کے وکیل فاران سردار ایڈووکیٹ نے دلائل دیتے ہوئے کہا کہ تحریکِ انصاف کے کارکنان نے پارٹی سے منحرف ڈاکٹر رمیش کمار کے گھر پر احتجاج کیا تھا۔

وکیل نے دلائل میں کہا کہ ڈاکٹر رمیش کمار اس وقت سندھ ہاس اسلام آباد میں موجود تھے، ان کے اغوا کی کوشش کا پولیس کا دعوی غلط ہے، پولیس مقدمے میں اب تک کوئی گواہ پیش نہیں کر سکی، پولیس نے جس سی سی ٹی وی کی بنیاد پر مقدمہ درج کیا وہ آج تک پیش نہیں کی گئی ہے۔واضح رہے کہ ڈاکٹر رمیش کمار کے گھر پر احتجاج کا مقدمہ تھانہ بوٹ بیسن میں مارچ 2022 میں درج کیا گیا تھا۔