گرین لاک ڈاون بھی سموگ میں کمی نہ لا سکا،لاہورکا اے کیو انڈیکس1067کی خطرناک حد پہنچ گیا

حد نگاہ صفر ہوگئی، ڈیفنس ڈی ایچ اے کا ایئر کوالٹی انڈیکس 1853، لبرٹی چوک میں 1208 تک جا پہنچا، شہر میں فضائی آلودگی کا گزشتہ سالوں کا ریکارڈ بھی ٹوٹ گیا ،فضائی معیار آج انتہائی مضر صحت کی حد چھو گیا

فیصل علوی ہفتہ 2 نومبر 2024 11:16

گرین لاک ڈاون بھی سموگ میں کمی نہ لا سکا،لاہورکا اے کیو انڈیکس1067کی ..

لاہور(اردوپوائنٹ اخبار تازہ ترین۔ 02 نومبر 2024) صوبائی دارالحکومت لاہور میں گرین لاک ڈاون بھی سموگ میں کمی نہ لا سکا، فضائی آلودگی نے ڈیرے ڈال دئیے، سموگ کے باعث ہر منظر دھند لا گیا، لاہور ایک بار پھر دنیا کا آلودہ ترین شہر بن گیا،حد نگاہ صفر ہوگئی،ائیر کوالٹی انڈیکس خطرناک ترین حد کو چھو گیا،شہر لاہور کا مجموعی ایئر کوالٹی انڈیکس ایک ہزار سے تجاوز کر گیا،شہر کا اے کیو آئی رواں سیزن کا سب سے زیادہ 1067 ریکارڈ کیا گیا، ڈیفنس (ڈی ایچ اے) کے علاقے کا ایئر کوالٹی انڈیکس 1853، لبرٹی چوک میں 1208 تک جا پہنچا ہے۔

اسی طرح شملہ پہاڑی کے اطراف کا ایئر کوالٹی انڈیکس 1007 تک پہنچ گیا ہے۔لاہور میں فضائی معیار آج انتہائی مضر صحت ہے،تفصیلات کے مطابق رپورٹ کے مطابق لاہور شہر میں لگنے والے 11 علاقوں کے گرین لاک ڈاون بھی سموگ میں کمی نہ لا سکے، شہر میں فضائی آلودگی کا گزشتہ سالوں کا ریکارڈ بھی ٹوٹ گیا ہے۔

(جاری ہے)

فضائی آلودگی کے اعتبار سے بھارت کا شہر کولکتہ311 اے کیو آئی کے ساتھ دوسرے اور دہلی258 اے کیو آئی کے ساتھ تیسرے نمبر پر ہے۔

لاہور شہر میں عسکری 10 کا اے کیو آئی 1720،ڈی ایچ اے فیز 5 کا اے کیو آئی 1429 کی خطرناک سطح پر پہنچ گیا، گرین لاک ڈاون والے شملہ پہاڑی کے علاقے میں اے کیو آئی 1007 ریکارڈ کیا گیا۔صبح 7 بجے شہر کا اے کیو آئی 577 ریکارڈ کیا گیا تھا۔ 8 بجے کے بعد لاہور کا اے کیو آئی 848 سے اوپر ریکارڈ کیا گیا، اس کے علاوہ ملتان اور اس کے گرد و نواح میں سموگ کی شدت میں اضافہ ہو گیا ہے۔

ماہرین ماحولیات نے موجودہ فضا میں شہریوں کو باہر نکلنے سے پرہیز کرنے کی ہدایت کرتے ہوئے کہا ہے کہ بچے، بزرگ اور بیمار افراد گھروں میں رہنے کو ترجیح دیں۔ماہر ماحولیات کا کہنا ہے کہ شہر کی فضا آلودہ ہونے سے سانس لینے میں دشواری ہو رہی ہے، یہ فضا شہریوں کے ساتھ چرند پرند اور نباتات کیلئے بھی نقصان دہ ہے۔ موجودہ ماحول میں شہری متوازن خوراک اور پانی کا زیادہ استعمال کریں۔

لاہور میں فضائی آلودگی کے باعث سانس کے مسائل سامنے آرہے ہیں جبکہ آنکھوں میں جلن کی شکایات بھی ہیں۔ طبی ماہرین نے شہریوں کو ماسک پہن کر باہر نکلنے کی ہدایت کی ہے۔دوسری جانب سموگ کی روک تھام کیلئے صوبے بھر میں پولیس کی کارروائیاں جاری ہیں اور ترجمان پنجاب پولیس کے مطاببق رواں سال ایس او پیزکی خلاف ورزی کرنے والے 1035افراد کو گرفتار کیا جا چکا ہے اور 1330 کے مقدمات درج ہو چکے ہیں۔زہریلادھواں چھوڑنے پر 6 لاکھ گاڑیوں کے چالان کئے گئے اور غیر معیاری فٹنس پر ڈیڑھ لاکھ گاڑیاں بند کی گئیں۔زہریلادھواں چھوڑنے پر 10ہزارگاڑیوں کے فٹنس سرٹیفکیٹ معطل اور کروڑوں روپےکے جرمانے بھی عائد کئے گئے۔