6 نومبر 1947 کو تاریخ میں ہمیشہ ایک سیاہ دن کے طور پر یاد رکھا جائیگا،سپیکرقومی اسمبلی کا شہداء جموں کو خراج عقیدت

بدھ 6 نومبر 2024 16:53

اسلام آباد(اُردو پوائنٹ اخبارتازہ ترین - این این آئی۔ 06 نومبر2024ء) سپیکرقومی اسمبلی سردارایازصادق ن شہداء جموں کو خراج عقیدت پیش کرتے ہوئے کہا ہے کہ شہداء جموں کی قربانیوں کو تاریخ میں ہمیشہ سنہری حروف میں یاد رکھا جائے گا۔بدھ کوسپیکر قومی اسمبلی سردار ایاز صادق نے یوم شہداء جموں کے موقع پر اپنے پیغام میں کہاکہ 6 نومبر 1947 کو تاریخ میں ہمیشہ ایک سیاہ دن کے طور پر یاد رکھا جائے گا۔

سپیکر قومی اسمبلی نے کہاکہ 6 نومبر 1947 کے دن مہاراجہ ہری سنگھ کی جابر افواج نے پاکستان کی جانب ہجرت کرنے والے دو لاکھ سے زیادہ نہتے کشمیریوں کو شہید کیا،شہداء جموں نے حق خود ارادیت کے حصول کیلئے اپنی جانوں کے نذرانے پیش کیے ۔ایاز صادق نے کہاکہ یوم شہداء جموں کی قربانیاں رائیگاں نہیں جائیں گی،یوم شہداء جموں کی قربانیوں کو تاریخ میں ہمیشہ سنہری حروف میں یاد رکھا جائے گا۔

(جاری ہے)

سپیکر قومی اسمبلی نے کہاکہ شہداء جموں کا خون ضرور رنگ لائے گا اور مقبوضہ وادی میں جلد آزادی کا سورج طلوع ہوگا۔ سردار ایاز صادق نے کہاکہ حق خود ارادیت کے حصول کیلئے کشمیری عوام نے لازوال قربانیاں دی ہیں۔انہوںنے کہاکہ خطے میں پائیدار امن کے قیام کیلئے اقوام متحدہ کی قراردادوں اور کشمیری عوام کی امنگوں کے مطابق مسئلہ کشمیر کا حل ناگزیر ہے۔سپیکر قومی اسمبلی نے کہاکہ پاکستان مسئلہ کشمیر کے حل تک کشمیری عوام کی سفارتی، سیاسی اور اخلاقی حمایت جاری رکھے گا۔