آئی ایم ایف مشن اورپاکستان کی معاشی ٹیم کے درمیان مذاکرات کاپہلا دور ختم

منگل 12 نومبر 2024 23:18

اسلام آباد (اُردو پوائنٹ اخبارتازہ ترین - این این آئی۔ 12 نومبر2024ء) پاکستان کے دورے پر آئے آئی ایم ایف کے مشن اور پاکستان کی معاشی ٹیم میں مذاکرات کا پہلا دور ختم ہوگیا۔وزارت خزانہ کے اعلامیے کے مطابق آئی ایم ایف کے وفد نے وزیر خزانہ محمد اورنگزیب کی قیادت میں پاکستانی وفد سے ملاقات کی جس دوران وزیرمملکت علی پرویز ، سیکرٹری خزانہ، چیئرمین ایف بی آر اور گورنراسٹیٹ بینک بھی شریک ہوئے جب کہ آئی ایم ایف وفد کی قیادت ناتھن پورٹر نے کی۔

(جاری ہے)

ذرائع وزارت خزانہ کے مطابق آئی ایم ایف اور ایف بی آر کے درمیان دوبارہ مذاکرات ہوں گے جس میں ایف بی آرحکام آئی ایم ایف وفد کو ٹرانسفارمیشن پلان ،ٹریک اینڈ ٹریس اور ریٹیلرز اسکیم پربریفنگ دیں گے۔ذرائع کے مطابق ٹرانسفارمیشن پلان کے تحت ایف بی آر کو ڈیجیٹلائز کرنا اور ٹیکس وصولی کیلئے ایآئی کا استعمال کرنا شامل ہے جب کہ ٹریک اینڈ ٹریس سسٹم کے تحت 5 شعبوں میں سسٹم کی انسٹالیشن کا جائزہ لیا جائے گا،ریونیو شارٹ فال پورا کرنے کیلئے پلان پر ایف بی آر انفورسمنٹ آرڈیننس پر مشن کو بریف کیا جائے گا۔ ذرائع وزارت خزانہ کے مطابق مذاکرات میں رجسٹرڈ تاجروں کاڈیٹا اور ان سے ٹیکس وصولی پر آئی ایم ایف حکام کو آگاہ کیا جائے گا۔