خیبرپختونخوا میں اس وقت دو حکومتیں چل رہی ہیں، فیصل کریم کنڈی

منگل 12 نومبر 2024 20:20

مردان (اُردو پوائنٹ اخبارتازہ ترین - این این آئی۔ 12 نومبر2024ء) گورنر خیبر پختونخوا فیصل کریم کنڈی نے کہا ہے کہ صوبے میں اس وقت دو حکومتیں چل رہی ہیں تاہم صوبے میں ایسی صورتحال نہیں کہ گورنر راج لگایا جائے۔سابق وزیر اعلی امیر حیدر ہوتی سے ملاقات کے بعد میڈیا سے گفتگو کرتے ہوئے گورنر خیبر پختونخوا فیصل کریم کنڈی نے کہا کہ ایک حکومت بشری بی بی اور دوسری وزیر اعلی چلا رہے ہیں۔

انہوں نے کہا کہ آئین میں گورنر راج کی شق موجود ہے۔

(جاری ہے)

تاہم صوبے میں ایسی صورتحال نہیں کہ گورنر راج لگایا جائے۔فیصل کریم کنڈی نے کہا کہ صوبائی کابینہ میں ایک وزیر زیادہ ہے اسے ڈی نوٹیفائڈ کرنا پڑے گا۔ انہوں نے کہا کہ ہماری نسلوں کو سنوارنے والے اساتذہ آج سڑکوں پر ہیں اور صوبے کے پاس تنخواہوں اور پنشن کیلئے پیسے نہیں ہیں۔انہوں نے کہا کہ 26یونیورسٹیوں کے وائس چانسلر نہیں ہیں، سرکاری ملازمین کو ریاست کیخلاف استعمال کیا گیا جبکہ قیدی جلسے جلوسوں سے نہیں عدالتوں سے رہا ہوں گے۔ انہوں نے کہا کہ باقی صوبوں میں ترقیاتی منصوبے جاری ہیں جبکہ ہمارے ہاں صرف دھرنوں کے اعلانات ہو رہے ہیں۔