پاک سر زمین پر سانس لینا بھی محال

لاہور(اُردو پوائنٹ اخبارتازہ ترین۔ 27 نومبر2024ء،اریبہ طارق) پاکستان میں میں فضائی آلودگی ہر سال  گزرتے سال کے ساتھ خطرناک حد تک بڑھتی جار ہی ہے۔خصوصاً لاہور  اور پنجاب کے دیگر شہروں میں اسموگ اور فضائی آلودگی کی شرح   اس حد  کو  چھو لیتی  ہے  جو    انسان کیلئے انتہائی مضرِ صحت ہے۔   اسموگ کے روگ سے نمٹنے کیلئےحکومتیں مستقل  پالیسیاں متعارف کرانے کے بجائے ڈنگ ٹپاو  پالیسی پر عمل پیرا ہیں ۔

کبھی گرین لاک ڈاون اور کبھی 8 بجے  مارکیٹیں بند کرنے کا حکم جاری  کر  دیا جاتاہے تو کبھی  کسانوں پر  ذمہ داری  ڈال کر  ایوانوں میں بیٹھے لوگ بری الذمہ ہو جاتے ہیں۔ لاہور میں  نومبر کے پہلے ہفتے میں ائیر کوالٹی انڈیکس 1173 ریکارڈ کیا گیا تھا۔ پنجاب کے مختلف شہروں میں ائیر کوالٹی انڈیکس1 ہزار کی سطح عبور  کر گئی تھی۔

(جاری ہے)

چندروز پہلے ملتان میں ائیر کوالٹی انڈیکس 2000  کی سطح عبور  کر کے2 ہزار 135  تک  جا پہنچا۔

تشویشناک بات یہ ہے کہ 300 سے زائد ائیر کوالٹی انڈیکس مضر صحت ہے ۔جنوبی اور وسطی پنجاب  شدید  سموگ کی لپیٹ میں رہے، اب فضائی ا ٓلودگی پنجاب  کے علاوہ دوسرے صوبوں تک  بھی پھیل گئی ہے۔ پشاور سمیت کے پی کے دیگر اضلاع بھی فضا آلودگی کی لپیٹ میں ہیں۔پنجاب میں  اسموگ مستقل چیلنج بن چکا ہے،اس  مسئلے کو بھارت میں فصلوں کی باقیات جلانے سے جوڑا جاتا ہے  لیکن حکومت کے پنجاب اسمبلی میں پیش کیے  گئے اپنے ہی  اعداد و شمار حکومتی وزراء  کا منہ  چڑا رہے ہیں۔

اعداد و شمار کے مطابق  اسموگ  کی  سب سے بڑی وجہ  ٹرانسپورٹ ہے  ٹرانسپورٹ  فضائی آلودگی میں 39 فیصد حصہ ڈال رہی ہے۔صنعتی آلو دگی  24 فیصد، انرجی  16 فیصد اور فصلوں  کی  باقیات کو  جلانا15 سے 20 فیصد  اسموگ کا سبب بن  رہی ہیں۔ ماہرین  ماحولیات  کے مطابق   صنعتی سرگرمیاں،ٹرانسپورٹ   اور کمرشل  سرگرمیاں  بڑی وجوہات ہیں۔اینٹی سائیکلون   کی وجہ سے ہوا  ایک جگہ اکٹھی ہو جاتی ہے ۔

ٹرانسپورٹ کی بہتر سہولیات نہ ہونے کی وجہ سے  گاڑیوں کی تعداد میں اضافہ ہو رہا ہے ،   مارچ 2024 کے اعدادو شمار کےمطابق پاکستان میں 35 سے 40 ملین موٹرسائیکلیں رجسٹرڈ ہو ئیں جس میں 6 ملین لاہور ڈویژن میں رجسٹر ڈ ہوئی تھیں۔  لاہور میں رہائشی علاقوں کے قریب  فضا  کو آلودہ کرنے والے  انڈسٹریاں قائم ہیں۔   اب سوال یہ ہے کہ کیا دھواں چھوڑنے والے بھٹے بند ہو گئے؟ کیا  دھواں چھوڑنے والی  فیکٹریوں  یا انڈسٹری  کو لگا م ڈالی   گئی؟کیا   سموگ کی سب سے بڑی وجہ ٹرانسپورٹ کیلئے کوئی  پالیسی متعارف کروا ئی گئی؟ نئی ہاوسنگ سوسائٹیوں سے متعلق  کوئی پالیسی بنائی گئی؟ ماحولیاتی آلودگی کو کم کرنے کیلئے شجرکاری مہم میں حکومت    نے سنجیدگی کا  مظاہرہ کیا؟  کیا صنعتی  ایریاز سے متعلق کوئی لانگ ٹرم  پلان سامنے آ یا؟۔

کیا لاہور میں    تعمیراتی  کام بند ہوگئے ۔؟کیااسکول ،کالج بندکرنے سے اسموگ   کی شدت میں کمی آئی؟ ان سوالوں کا جواب آپ کو نہیں ملے گا کیونکہ حکومتیں سنجیدہ ہوتیں تو گزشتہ 10 برس سے کوئی نہ کوئی ٹھوس حکمتِ عملی سامنے آ چکی ہوتی ۔حکومتیں جب تک  ان حقائق سے نظریں چراتی رہیں گی     تب تک اسموگ اور فضائی آلودگی سے چھٹکارا   نہیں پایا جا سکتا۔