نوجوانوں کی منفی ذہن سازی کی جارہی ہے،نوجوان جھوٹے پروپیگنڈوں کو مسترد کردیں، وزیراعلیٰ بلوچستان

جمعہ 29 نومبر 2024 12:57

کوئٹہ (اُردو پوائنٹ اخبارتازہ ترین - اے پی پی۔ 29 نومبر2024ء) وزیراعلیٰ بلوچستان میرسرفراز احمد بگٹی نے کہاہے کہ مختلف ممالک سے منظم سازش کے تحت آرٹیفیشل انٹیلی جنس کے ذریعے نوجوانوں کی منفی ذہن سازی کی جارہی ہے ،نوجوان جھوٹے پروپیگنڈوں کو عملی اقدامات کے ذریعے مسترد کردیں ۔ان خیالات کااظہار انہوں نے گورنمنٹ گرلز پوسٹ گریجویٹ ڈگری کالج میں پنک سکوٹی تقسیم کی تقریب سے خطاب کرتے ہوئے کیا۔

اس موقع پر صوبائی وزیر تعلیم راحیلہ حمید درانی ،صوبائی وزیر تعمیرات میر سلیم احمد کھوسہ ،صوبائی وزیر ایری گیشن میر محمدصادق عمرانی ،چیف سیکرٹری بلوچستان شکیل قادر خان ودیگر بھی موجود تھے ۔تقریب میں وزیر اعلی بلوچستان نے قرعہ اندازی کے ذریعے 50 طالبات کو پنک سکوٹیز دی گئیں ۔

(جاری ہے)

تقریب سے خطاب کرتے ہوئے وزیراعلیٰ بلوچستان میرسرفرازبگٹی نے کہاکہ بلوچستان کی ہر باصلاحیت اور پوزیشن ہولڈر طالبہ کو پنک سکوٹی دیں گے، طالبات کے لئے جامع پنک سکوٹی سکیم متعارف کرارہے ہیں ، بلوچستان میں خواتین کو بااختیار دیکھنا چاہتے ہیں۔

وزیر اعلی میر سرفراز بگٹی نے کہاکہ بلوچستان میں 5 خواتین ڈپٹی کمشنر ز،30مرد ڈپٹی کمشنرزسے اچھا کام کررہی ہیں ، غیر متوازن ترقی کو لیکر ریاست کے خلاف نوجوانوں کی ذہن سازی کرکے پاکستان کے خلاف منظم سازشیں ہورہی ہیں، انہوں نے کہاکہ مختلف ممالک سے منظم سازش کے تحت آرٹیفیشل انٹیلی جنس کے ذریعے نوجوانوں کی منفی ذہن سازی کی جارہی ہے، نوجوان جھوٹے پروپیگنڈوں کو اپنے سوشل میڈیا اکانٹس سمیت عملی اقدامات کے ذریعے مسترد کردیں،مستونگ میں معصوم طالب علموں کو دہشت گردی کا نشانہ بنایا گیا، ہزارہ کمیونٹی اور بہادر خان ویمن یونیورسٹی کی بچیوں کا خون بہایا گیانوجوانوں کی مدد سے دہشت گردی کا مقابلہ کریں گے ۔

وزیر اعلی بلوچستان میر سرفراز بگٹی نے کہاکہ ہم اپنے تعلیمی ادارے ویران ہونے نہیں دیں گے، طالب علم اور نوجوان کرپشن کے خلاف اپنے والدین کو آگے بڑھنے پر قائل کریں ، اسمبلی میں پہلے روز وعدہ کیا تھا کہ یہاں کوئی نوکری نہیں بکے گی، الحمدللہ وعدے کی تکمیل کررہے ہیں، آج پشین میں میرٹ کے باعث ایک جمعدار کی بیٹی کو سرکاری ملازمت ملی ہے۔

وزیر اعلی بلوچستان میر سرفراز بگٹی نے کہاکہ پورے صوبے میں میرٹ کو یقینی بنانے کے لیے پرعزم ہیں، بلوچستان کے نوجوان باصلاحیت ہیں ، مواقعوں کی کمی ہے نوجوانوں کو ترقی کے مواقع فراہم کرکے ان کی ریاست سے دوری ختم کریں گے، کرپشن کے خلاف اقدامات میں نوجوانوں نے میرا بازو بننا ہے میرا ساتھ دینا ہے تاکہ ملکر بلوچستان کو ترقی کی راہ پرگامزن کرسکے ۔