Live Updates

یہ بات بالکل ٹھیک ہے کہ ملک میں ریموٹ کنٹرول جمہوریت چل رہی ہے

کیا پاکستان پر اس وقت مالیاتی اداروں سمیت عالمی دباؤ نہیں ہے؟ اگر حکومت کے ساتھ ادارے ہیں تو دوسری جانب انٹرنیشنل اسٹیبلشمنٹ کھڑی ہیں۔ مرکزی رہنماء ن لیگ میاں جاوید لطیف

ثنااللہ ناگرہ پیر 30 دسمبر 2024 22:13

یہ بات بالکل ٹھیک ہے کہ ملک میں ریموٹ کنٹرول جمہوریت چل رہی ہے

لاہور ( اردوپوائنٹ اخبار تازہ ترین۔ آئی پی اے ۔ 30 دسمبر 2024ء ) پاکستان مسلم لیگ ن کے مرکزی رہنماء میاں جاوید لطیف نے کہا ہے کہ یہ بات بالکل ٹھیک ہے کہ ملک میں ریموٹ کنٹرول جمہوریت چل رہی ہے، کیا پاکستان پر اس وقت مالیاتی اداروں سمیت عالمی دباؤ نہیں ہے؟اگر حکومت کے ساتھ ادارے ہیں تو دوسری جانب انٹرنیشنل اسٹیبلشمنٹ کھڑی ہیں۔ انہوں نے اے آروائی نیوز کے پروگرام میں گفتگو کرتے ہوئے کہا کہ یہ بات بالکل ٹھیک ہے کہ ملک میں ریموٹ کنٹرول جمہوریت چل رہی ہے، بدقسمتی سے جمہوریت کو تین جانب سے کنٹرول کیا جارہا ہے، انٹرنیشنل اسٹیبلشمنٹ سمیت جمہوریت کو کنٹرول کرنے کی تین قسمیں ہیں، جس جمہوریت کی اہم بات کرتے ہیں اس کیلئے ورکر قربانی دیتا ہے لیکن حالات ایسے بن جاتے ہیں، کہ کمپرومائز ہونا پڑتا ہے۔

(جاری ہے)

ایک وقت آئے گا کہ بینیفشری بھی پچھتائیں گے، کیونکہ ملک میں ہائبرڈنظام نہیں چل سکتا، معیشت میں سکت نہیں ہے۔ 2014 سے 2017 تک ایک ادارہ نہیں تھا بلکہ دو اداروں نے مل کر بربادی کی۔ کیا پاکستان پر اس وقت عالمی دباؤ نہیں ہے اور کیوں ہے؟ آج اگر حکومت کے ساتھ ادارے ہیں تو دوسری جانب بھی بڑی قوتیں کھڑی ہیں، آج اگر ایک ساتھ انٹرنل اسٹیبلشمنٹ ہے تو دوسری جانب انٹرنیشنل اسٹیبلشمنٹ کھڑی ہے۔

ہم مذاکرات کے مخالف نہیں لیکن دباؤ میں مذاکرات ہوں تو سخت مخالف ہیں، آج پاکستان پر مالیاتی اداروں سمیت دباؤ ڈالا جارہا ہے، فارن فنڈنگ کا کیس کیا تھا؟ فارن فنڈنگ پر کیوں پابندی لگائی جاتی ہے؟وہ پیسا آج بول رہا ہے، ایک لابنگ فرم ہائر کرکے ریاست کے خلاف جو آئندہ آنے والی امریکی رجیم کے ساتھ مل کر کیا جارہا ہے وہ قابل برداشت ہے؟ اگر سائفر لہرایا تھا تو امریکا کی منتیں کون کررہا ہے؟ امریکا کا غلام کون بنا ہوا ہے؟ اگر ریاست قائم دائم رہے گی تو رجیم چینج ، آئین قانون اور جمہوریت کی بات ہوگی۔

افغانستان سے پاکستان پر حملہ ہورہا ہے، وہاں سے پاکستان کے اندر دہشتگردی ہورہی ہے، لیکن عمران خان کہتا آپ نے غلط کام کیا ہے، دو سالوں سے وہاں سے دہشتگردی رکنے کا نام نہیں لے رہی، کیا آپ کو پاکستان عزیز ہے یا وہ عزیزہیں؟