وزیراعلیٰ پنجاب کسان کارڈ کی رجسٹریشن کا عمل جاری

اب تک13 لاکھ40 ہزار کسانوں نے کسان کارڈ کیلئے رجسٹریشن کرا چکے ہیں، سیکرٹری زراعت پنجاب

بدھ 1 جنوری 2025 15:11

وزیراعلیٰ پنجاب کسان کارڈ کی رجسٹریشن کا عمل جاری

مکوآنہ (اُردو پوائنٹ اخبارتازہ ترین - این این آئی۔ 01 جنوری2025ء)سیکرٹری زراعت پنجاب افتخارعلی سہو کی زیرِ صدارت ایگریکلچر ہاؤس میں وزیر اعلیٰ پنجاب کسان کارڈ اور زرعی ٹیوب ویلز سولرائزیشن پروگرام کی پیش رفت سے متعلق جائزہ اجلاس کا انعقاد ہوا۔اس موقع پر سیکرٹری زراعت پنجاب افتخار علی سہو نے کہا کہ وزیر اعلیٰ پنجاب کسان کارڈ کی رجسٹریشن کا عمل جاری ہے۔

اب تک13 لاکھ40 ہزار کسانوں نے کسان کارڈ کیلئے رجسٹریشن کرا چکے ہیں۔ انھوں نے مزید کہا کہ کل 5لاکھ13 ہزار کسان کارڈز فیلڈ میں جا چکے ہیں۔ اب تک وزیر اعلیٰ پنجاب کسان کارڈ کے تحت 53 ارب روپے کی منظوری ہو چکی ہے۔کسان کارڈ کے ذریعی32 ارب روپے کی خریداری ہو چکی ہے جس میں کل خریداری کا 90فیصد صرف کھاد کے لئے استعمال ہوا۔

(جاری ہے)

سیکرٹری زراعت پنجاب نے مزید کہا کہ 9 ارب روپے کی لاگت سے وزیر اعلیٰ پنجاب زرعی ٹیوب ویلز سولرائزیشن پروگرام پر عملدرآمد جاری ہے جس کے تحت 8 ہزار بجلی و ڈیزل سے چلنے والے زرعی ٹیوب ویلز کو شمسی توانائی پر منتقل کیا جا رہا ہے۔

انھوں نے کہا کہ کاشتکاروں کی سہولت کیلئے درخواستوں کی وصولی میں 6جنوری2025تک تو سیع کر دی گئی ہے۔ اس پروگرام کے تحت حکومت پنجاب10،15 اور20 کلو واٹ کیلئے بالترتیب پانچ لاکھ، ساڑھے سات لاکھ اور دس لاکھ روپے سبسڈی فراہم کر رہی ہے۔اجلاس میں سپشل سیکرٹری زراعت آغا بنیل اختر، ایڈیشنل سیکرٹری زراعت(پلاننگ) کیپٹن (ر) وقاص رشید،ڈائریکٹر جنرلز زراعت چوہدری عبدالحمید، نوید عصمت کاہلوں،رانا تجمل حسین اور انجنئیرساجد ناصر سمیت دیگر افسران نے شرکت کی۔