سرکاری ملازمین کے لئے ای وی گاڑیاں خریدنے کا فیصلہ۔

جن محکموں کے پاس اضافی گاڑیاں ہیں وہ اپنی ضرورت سے زیادہ گاڑیاں حکومت کو واپس کردیں،شرجیل انعام میمن

جمعرات 16 جنوری 2025 23:27

سرکاری ملازمین کے لئے ای وی گاڑیاں خریدنے کا فیصلہ۔

کراچی(اُردو پوائنٹ اخبارتازہ ترین - آن لائن۔ 16 جنوری2025ء):حکومت سندھ نے بیکار سرکاری گاڑیاں ایک ماہ کے اندر نیلام کرنے اور کراچی کے سرکاری ملازمین کے لئے ای وی گاڑیاں خریدنے کا فیصلہ کیا ہے۔ سندھ کابینہ کی ذیلی کمیٹی برائے کفایت شعاری کا اہم اجلاس سندھ کے سینئر وزیر شرجیل انعام میمن کی زیر صدارت میں سندھ سیکریٹریٹ کراچی میں ہوا۔ اجلاس میں صوبائی وزیر برائے بلدیات سعید غنی،صوبائی وزیر داخلہ و قانون ضیا الحسن لنجار،صوبائی وزیر برائے جیل خانہ جات اور ورکس اینڈ سروسز علی حسن زرداری اور مختلف محکموں کے سیکریٹریز نے شرکت کی۔

اجلاس کے موقع پر کمیٹی ممبران نے سرکاری گاڑیوں کی الاٹمنٹ کو ریگولیٹ کرنے کے لیے واضح گائیڈ لائنز پر عمل کرنے کی ہدایات جاری کیں، جبکہ اجلاس میں مختلف محکموں کی سیکریٹریز نے سرکاری گاڑیوں سے متعلق دس سالہ رکارڈ پیش کیا۔

(جاری ہے)

اجلاس کے موقع پر بات کرتے ہوئے سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ نیلامی کا عمل ایک ماہ کے اندر مکمل ہونا چاہیے تاکہ وسائل مزید ضائع نہ ہوں،اور نئی گاڑیوں کی ضرورت کو پورا کیا جا سکے،ای وی گاڑیاں خریدنے سے حکومت کو فائدہ ہوگا، پی او ایل کی بچت ہوگی، ان کی نیلامی میں بھی آسانی ہوگی۔

انہوں نے کہا کہ حکومت عوامی وسائل کے استعمال میں شفافیت اور احتساب کو یقینی بنانے کے لیے پرعزم ہے،سرکاری گاڑیوں کا غیر مجاز استعمال کرنے والوں کو سختی سے کہتے ہیں کہ حکومتی احکامات کے تحت گاڑیاں واپس کریں،تمام متعلقہ عہدیدار اور محکمے قانونی کارروائی سے بچنے کے لیے نئی ہدایات پر عمل کریں۔سینئر وزیر شرجیل انعام میمن نے کہا کہ بیکار گاڑیوں کی نیلامی پر بھی کام جاری ہے،نیلامی پوری شفافیت کے ساتھ کی جائے گی۔

اجلاس کے موقع پر بات کرتے ہوئے صوبائی وزیر برائے بلدیات سعید غنی نے کہا کہ بیکار گاڑیوں کی بروقت نیلامی بہت اہم ہے،غیر ضروری اخراجات میں کمی لائی جا سکے گی،جن محکموں کے پاس اضافی گاڑیاں ہیں وہ اپنی ضرورت سے زیادہ گاڑیاں حکومت کو واپس کردیں۔ وزیر داخلہ و قانون ضیاالحسن لنجار نے اجلاس کے موقع پر اظہار خیال کرتے ہوئے کہا کہ بیکار گاڑیوں کی نشاندہی اور حکومتی پالیسیوں کی تعمیل کو یقینی بنانے کے لیے تیزی سے کام کیا جا رہا ہے،ہمارا مقصد عوام کا پیسہ بچانا اور ضروریات کے مطابق اخراجات کو یقینی بنانا ہے۔

اجلاس میں صوبائی وزیر برائے جیل خانہ جات اور ورکس اینڈ سروس علی حسن زرداری نے کہا کہ مکمل طور پر شفاف نیلامی کو یقینی بنایا جائے، فنڈز سے نئی گاڑیوں کہ خریداری میں مدد ملے گی۔#