چوہدری پرویز الہی کیخلاف غیر قانونی بھرتیوں کے کیس کی سماعت ملتوی

منگل 21 جنوری 2025 12:30

لاہور (اُردو پوائنٹ اخبارتازہ ترین - اے پی پی۔ 21 جنوری2025ء) لاہور کی انسداد رشوت ستانی کی خصوصی عدالت نے پنجاب اسمبلی میں غیر قانونی بھرتیوں کے الزام میں درج مقدمے میں سابق وزیر اعلی و سابق سپیکر پنجاب اسمبلی چوہدری پرویز الہی سمیت دیگر ملزمان کے خلاف کیس کی سماعت 4 فروری تک ملتوی کرتے ہوئے دیگر ملزمان کی حاضری لگا دی اور چوہدری پرویز الہی کو آئندہ سماعت پر طلب کر لیا۔

(جاری ہے)

عدالت نے حکم دیا کہ آئندہ سماعت پر تمام ملزمان کو پیش کیا جائے تاکہ فرد جرم کی کارروائی مکمل کی جا سکے۔اینٹی کرپشن عدالت کے جج سردار محمد اقبال ڈوگر نے منگل کوکیس کی سماعت کی۔ چوہدری پرویز الہی کی حاضری معافی کی درخواست جمع کروائی گئی ۔درخواست میں موقف اختیار کیا گیا کہ پرویز الہی کی طبیعت ناساز ہے ڈاکٹرز نے انہیں مکمل آرام کا مشورہ دیا ہے، عدالت نے ایک روزہ حاضری معافی کی درخواست منظور کرلی جبکہ چوہدری پرویز الہی کے شریک ملزم محمد خان بھٹی نے عدالت کو آگاہ کیا کہ ان کا نام ای سی ایل (ایگزٹ کنٹرول لسٹ) میں شامل کر دیا گیا ہے، جس پر عدالت نے انہیں متعلقہ فورم سے رجوع کرنے کی ہدایت کی۔