پاکستان اور سعودی عرب کا 1 ارب 20 کروڑ ڈالر کے ادھار تیل کا معاہدہ

اسلام آباد ( اُردو پوائنٹ اخبارتازہ ترین۔ 04 فروری 2025ء ) پاکستان اور سعودی فنڈ برائے ترقی کے درمیان ایک سال کے لئے 1 ارب 20 کروڑ ڈالر کے تیل کی مؤخر ادائیگی کا معاہدہ طے پا گیا، جو پٹرولیم مصنوعات کی مستحکم فراہمی کو یقینی بنا کر پاکستان کی معیشت کو مضبوط بنانے میں مددگار ثابت ہوگا، اس کے علاوہ مانسہرہ میں واٹر سپلائی سکیم کے لیے 41 ملین ڈالر کی فراہمی کے معاہدے پر بھی دستخط کیے گئے۔

تفصیلات کے مطابق وزیراعظم محمد شہباز شریف نے آئل امپورٹ فنانسنگ کی سہولت اور مانسہرہ خیبر پختونخواہ میں گریویٹی فلو واٹر سپلائی سکیم معاہدوں پر دستخطوں کی تقریب میں شرکت کی، سیکرٹری اقتصادی امور ڈویژن ڈاکٹر کاظم نیاز اور سی ای او ایس ایف ڈی سلطان بن عبدالرحمان المرشد نے اپنی اپنی حکومتوں کی جانب سے معاہدوں پر دستخط کیے، نائب وزیراعظم اسحاق ڈار، وفاقی وزیر اقتصادی امور ڈویژن احد خان چیمہ، وفاقی وزیر خزانہ محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر پٹرولیم ڈاکٹر مصدق ملک اور معاون خصوصی برائے وزیراعظم طارق فاطمی، پاکستان میں سعودی سفیر نواف بن سعید المالکی اور سعودی وفد کے ارکان بھی اس موقع پر موجود تھے۔

(جاری ہے)

وزیراعظم افس کے میڈیا ونگ سے جاری بیان میں بتایا گیا کہ وزیراعظم محمد شہباز شریف سے سعودی فنڈ برائے ترقی کے وفد نے فنڈ کے چیف ایگزیکٹو آفیسر سلطان بن عبدالرحمٰن المرشد کی قیادت میں ملاقات کی، وزیراعظم نےسعودی عرب اور پاکستان کے درمیان دیرینہ دوستی کا حوالہ دیتے ہوئے صحت، توانائی، انفراسٹرکچر اور تعلیم کے شعبوں میں پاکستان کو مالی امداد فراہم کرنے کے ساتھ ساتھ 2022ء کے تباہ کن سیلاب کے بعد تعمیر نو کے لئے سعودی فنڈ برائے ترقی کی کوششوں کو سراہا۔

معلوم ہوا ہے کہ سعودی فنڈ کے چیف ایگزیکٹو آفیسر نے سعودی وفد کے پرتپاک استقبال اور مہمان نوازی پر وزیراعظم اور حکومت پاکستان کا شکریہ ادا کیا، انہوں نے وزیراعظم کو جاری منصوبوں بشمول مہمند ہائیڈرو پاور پراجیکٹ، گولن گول ہائیڈرو پاور پراجیکٹ، مالاکنڈ ریجنل ڈویلپمنٹ پراجیکٹ اور سعودی گرانٹس کے ذریعے فنڈ کئے گئے دیگر منصوبوں کے بارے پیشرفت سے آگاہ کیا، وزیر اعظم نے سعودی فنڈ برائے ترقی کی امداد کو سراہتے ہوئے گرین انرجی اور بنیادی ڈھانچے کے شعبے میں فنڈ کے ساتھ اشتراک کے نئے منصوبوں پر کام کی رفتار کو تیز کرنے کی ضرورت پر زور دیا جن کے ذریعے پاکستان کی پائیدار ترقی کو یقینی بنانے میں مدد ملے گی۔

بتایا جارہا ہے کہ ایس ایف ڈی کے چیف ایگزیکٹو آفیسر نے مشترکہ منصوبوں پر جلد کارروائی کی یقین دہانی کرائی اور اس بات کا اعادہ بھی کیا کہ سعودی عرب شاہی خاندان کی قیادت میں پاکستان کو ہر ممکن مدد اور مسلسل تعاون فراہم کرے گا، وزیر اعظم نے سی ای او اور وفد کے ارکان کا شکریہ ادا کیا اور شاہی خاندان کے تمام ارکان بالخصوص خادم الحرمین الشریفین شاہ سلمان بن عبدالعزیز السعود اور ولی عہد اور وزیر اعظم محمد بن سلمان کے لیے نیک خواہشات کا اظہار کیا۔

دریں اثناء وزیراعظم نے آئل امپورٹ فنانسنگ فیسلٹی پر دستخط کا خیرمقدم کیا جس کے تحت پاکستان کو ایک سال کے لئے 1.20 ارب ڈالر کا تیل مؤخر ادائیگی پر ملے گا، یہ منصوبہ فوری مالیاتی بوجھ کو کم کرتے ہوئے پٹرولیم مصنوعات کی مستحکم فراہمی کو یقینی بنا کر پاکستان کی معیشت کو مضبوط بنانے میں مددگار ثابت ہو گا، سعودی فنڈ برائے ترقی مانسہرہ خیبر پختونخواہ میں گریوٹی فلو واٹر سپلائی سکیم کے لیے 41 ملین ڈالر رعایتی قرضہ فراہم کرے گا، اس سے مانسہرہ کے 1 لاکھ 50 ہزار مقامی لوگوں کو پینے کے صاف پانی تک رسائی حاصل ہوگی اور 2040ء تک 2 لاکھ 01 ہزار 249 افراد کی پانی کی طلب کو پورا کیا جا سکے گا۔