پاکستان کی اعلی عسکری قیادت کا بھارت کے زیر تسلط مقبوضہ جموں و کشمیر کے بہادر عوام کی حق خودارادیت کی منصفانہ جدوجہد کی غیر متزلزل حمایت کا اعادہ

بدھ 5 فروری 2025 00:40

راولپنڈی (اُردو پوائنٹ اخبارتازہ ترین - اے پی پی۔ 05 فروری2025ء) پاکستان کی اعلی عسکری قیادت نےبھارت کے زیر تسلط مقبوضہ جموں و کشمیر کے بہادر عوام کی حق خودارادیت کی منصفانہ جدوجہد کے ساتھ اپنے غیر متزلزل حمایت کا اعادہ کرتے ہوئے کہا ہے کہ پاکستان کی افواج انسانی حقوق کی سنگین خلاف ورزیوں، ماورائے عدالت قتل، جبری گمشدگیوں اور بلاجواز گرفتاریوں کی شدید مذمت کرتی ہے۔

پاک فوج کے شعبہ تعلقات عامہ ( آئی ایس پی آر) کے مطابق یوم یکجہتی کشمیر کے موقع پر چیئرمین جوائنٹ چیفس آف سٹاف کمیٹی، سروسز چیفس اور پاک افواج نے بھارتی زیر تسلط مقبوضہ جموں و کشمیر کے بہادر عوام کی حق خودارادیت کی منصفانہ جدوجہد کے ساتھ اپنے غیر متزلزل حمایت کا اعادہ کیا ہے اور کہا کہ ہم کشمیری عوام کے ناقابل تسخیر عزم کو خراج تحسین پیش کرتے ہیں جنہوں نے دہائیوں سے جاری ظلم و ستم، ریاستی تشدد اور سنگین انسانی حقوق کی خلاف ورزیوں کا بہادری سے سامنا کیا ہے۔

(جاری ہے)

جبر کے خلاف ان کا غیر متزلزل حوصلہ پوری قوم کے لیے ہمت اور تحریک کا ذریعہ ہے۔پاک فوج کی قیادت نے کہا کہ یہ مظالم بھارت کے بین الاقوامی قوانین، انسانی اقدار اور بنیادی انسانی حقوق کی کھلم کھلا خلاف ورزی کا ثبوت ہیں،ہم عالمی برادری، انسانی حقوق کی تنظیموں اور اقوام متحدہ سے پرزور مطالبہ کرتے ہیں کہ وہ مسئلہ کے فوری حل اور اقوام متحدہ کی سلامتی کونسل کی قراردادوں پر کشمیری عوام کی امنگوں کے مطابق عمل درآمد کو یقینی بنائیں۔

پاکستان کی افواج کشمیری عوام کے منصفانہ مقصد کے ساتھ اپنی وابستگی پر قائم ہیں اور پاکستان کی خودمختاری اور جغرافیائی سالمیت کے تحفظ کے اپنے فرض کو پورا کرنے کے لیے پرعزم ہیں۔ ہم اپنے کشمیری بھائیوں کے ساتھ ان کی آزادی اور وقار کے جائز مقصد میں شانہ بشانہ کھڑے ہیں۔پاکستان زندہ باد! کشمیر پائندہ باد!