دنیا کو پیغام دیتاہوں کہ ایران کے ساتھ کام کرنے کو تیار ہوں ، گورنرسندھ

جن مفاہمتی یاد داشتوںپر دستخط ہوئے ا ن پر عملدرآمد یقینی بنائیں گے،کامران ٹیسوری کا تقریب سے خطاب

منگل 11 فروری 2025 18:34

دنیا کو پیغام دیتاہوں کہ ایران کے ساتھ کام کرنے کو تیار ہوں ، گورنرسندھ

کراچی (اُردو پوائنٹ اخبارتازہ ترین - این این آئی۔ 11 فروری2025ء)گورنرسندھ کامران خان ٹیسوری نے کہا ہے کہ دنیا کو پیغام دیتا ہوں کہ ایران کے ساتھ کام کرنے کو تیار ہوں۔ آیت اللہ خامنہ ای کا مشکور ہوں ان کی ہدایت پر ایران صدر پاکستان تشریف لائے۔ یقین دلاتاہوں کہ جن مفاہمتی یادداشتوں پر دستخط ہوئے ان پر عمل یقینی بنائیں گے۔ ان خیالات کا اظہا ر انہوں نے ایران کے قونصل خانہ میں ایران کے انقلاب کی 46ویں سالگرہ کے موقع پر منعقدہ تقریب سے خطاب کرتے ہوئے کیا ۔

تقریب میں وزیر اعلیٰ سندھ، متحدہ رہنما ڈاکٹر فاروق ستار، سابق وزیر اعلیٰ سندھ سید قائم علی شاہ، ایرانی سفیرDr. Reza Amiri Moghadam ، مختلف ممالک کے قونصل جنرل سمیت دیگر شریک تھے۔ گورنرسندھ جب ایران کے قونصل خانہ پہنچے تو قونصل جنرل Hassan Nourian اور دیگر سفارتی عملہ نے ان کا پرتپا ک خیرمقدم کیا۔

(جاری ہے)

گورنرسندھ نے قونصل جنرل کو گلدستہ دیتے ہوئے ایران کے انقلاب کی سالگرہ کی مبارک باد دی۔

گورنرسندھ نے مزید کہاکہ ایران کی عوام کو انقلاب کی 46 ویں سالگرہ کی مبارک باد پیش کرتا ہوں۔ آیت اللہ خمینی کو دنیا بھر میں ہمیشہ یاد رکھا جائے گا۔ انہوں نے کہاکہ پاک ایران دوطرفہ تعلقا ت آج انتہائی مستحکم ہوچکے ہیں۔ یقین دلاتا ہوں کہ دو طرفہ تعلقات مزید مستحکم ہوں گے۔ انہوں نے کہاکہ دونوں برادر ممالک نے ہر مشکل گھڑی میں ایک دوسرے کا ساتھ دیا۔اب وقت آگیا ہے کہ مسلم امہ کے حق کے لئے تمام مسلم ممالک متحد ہوجائیں۔گورنرسندھ نے کہا کہ اپنا نیول چیف پاکستان بھیجنے پر ایرانی حکومت کا شکریہ ادا کرتاہوں ۔گورنرسندھ نے ایرانی قونصل خانہ میں منعقدہ ایرانی قالین نمائش میں بھی شرکت کی جہاں پر انہوں نے مختلف قالینوں کے خوبصورت ڈیزائن کی تعریف بھی کی ۔