دسمبر 2024 تک حکومت نے 1284 ارب روپے قرض لیا

دسمبر 2023 سے دسمبر 2024 تک حکومتی قرض 9.9 فیصد بڑھا جبکہ مقامی قرض بڑھ کر49 ہزار883 ارب روپے ہوگیا۔ اسٹیٹ بینک کے اعدادوشمار

ثنااللہ ناگرہ جمعہ 14 فروری 2025 20:01

دسمبر 2024 تک حکومت نے 1284 ارب روپے قرض لیا

کراچی (اُردو پوائنٹ اخبارتازہ ترین۔ 14 فروری 2025ء) اسٹیٹ بینک آف پاکستان نے دسمبر 2024 تک حکومتی قرض کے اعداد و شمار جاری کردیے ہیں۔ میڈیا کے مطابق اسٹیٹ بینک کے اعدادوشمار میں کہا گیا کہ دسمبر 2024 میں حکومت نے 1284 ارب روپے قرض لیا اور حکومتی قرضوں کا ذخیرہ 71647 ارب روپے ہوگیا ہے۔ اسی طرح دسمبر 2023 سے دسمبر 2024 تک حکومتی قرض 9.9 فیصد بڑھا جبکہ مقامی قرض سال 2024 میں 17.1 فیصد بڑھ کر 49883 ارب روپے ہوگیا، سی طرح حکومتی بیرونی قرض سال 2024 میں 3.7 فیصد کم ہوا جس کے بعد قرض کی رقم 21764 ارب روپے ہوگئی ہے۔

پہلی ششماہی میں حکومتی مقامی قرض 2723 ارب اور بیرونی قرض 10ارب روپے بڑھا۔ مزید برآں پاکستان اسٹاک ایکسچینج میں کاروبار کے آغاز پر زبردست تیزی دیکھی گئی جبکہ تبادلہ مارکیٹ میں ڈالر معمولی سستا ہو گیا ہے۔

(جاری ہے)

کاروباری ہفتے کے آخری روز اسٹاک ایکسچینج میں کاروبار کا مثبت آغاز ہوا ، 100 انڈیکس 859 پوائنٹس کے اضافے سے ایک لاکھ 13 ہزار 423 پوائنٹس پر پہنچ گیا۔

گزشتہ روز بھی پہلے سیشن میں اسٹاک مارکیٹ میں تیزی رہی تھی تاہم کاروبار کے اختتام پر انڈیکس منفی زون میں چلا گیا۔ گزشتہ روز اسٹاک مارکیٹ میں 19 ارب 16 کروڑ 27 لاکھ 38 ہزار 583 روپے مالیت کے 28 کروڑ 92 لاکھ 87 ہزار 556 شیئرز کا لین دین ہوا۔ دوسری جانب عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔

میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ فی تولہ سونے کی نئی قیمت بلند ترین سطح پرپہنچ گئی ہے۔ دو روز میں فی تولہ سونے کی قیمت میں 4700 روپے اور 10 گرام سونے کی قیمت میں 4 ہزار30 روپے کا اضافہ ہوا۔ جبکہ آج فی تولہ سونے کی قیمت میں 2 ہزار 200 روپے کا اضافہ ہوا ہے۔ فی تولہ سونے کی قیمت بڑھنے کے بعد مقامی صرافہ بازاروں میں نئی قیمت 3 لاکھ 6 ہزار200 روپے ہوگئی ہے۔ اسی طرح دس گرام سونے کی قیمت بھی پھر بڑھ گئی ہے۔ 10 گرام سونے کی قیمت میں 2 ہزار 886 روپے کا اضافہ ہوا ہے۔ نئی قیمت 2 لاکھ 62 ہزار517 روپے کی سطح پر پہنچ گئی ہے۔