سندھ حکومت نے جعلی مقدمات اور مخالف رہنماؤں کو گرفتار کر کے آمریت کو بھی شکست دے دی ہے، اسداللہ بھٹو

جمعرات 20 فروری 2025 17:35

کراچی (اُردو پوائنٹ اخبارتازہ ترین - این این آئی۔ 20 فروری2025ء)جماعت اسلامی کے سینئر رہنما سابق ایم این اے اسداللہ بھٹو نے کہا ہے کہ وینٹی لیٹر پر چلنے والی پی پی کی سندھ حکومت زیادہ دیر نہیں چل سکتی۔ بھٹو کے منشور کے برعکس اب یہ جمہوری نہیں بلکہ ظالم وڈیروں اورسرداروں کی پارٹی بن گئی ہے۔ سندھ میں بدامنی اور ڈاکو راج کو سندھ اسمبلی میں بیٹھے پیپلز پارٹی کے رہنماں کی مکمل حمایت حاصل ہے۔

سیاسی مخالفین کیخلاف انتقامی کارروائیوں سے استحکام کے بجائے انتشار اور افراتفری پھیلنے کا خدشہ ہے۔ پولیس کو سیاسی مقاصد کے لیے استعمال کرتے ہوئے سینئر سیاستدان غلام مرتضی خان جتوئی اور ڈاکو راج کے خاتمے کیلئے پر امن احتجاج کرنے والی جماعت اسلامی سندھ کے امیر کاشف سعید شیخ ودیگر رہنمائوں پر جھوٹا مقدمہ درج کر کے پ پ حکومت نے آمریت کے دور کو بھی پیچھے دھکیل دیا ہے۔

(جاری ہے)

جماعت اسلامی پرامن اور آئینی جدوجہد پر یقین رکھتی ہے۔ امن کی بحالی اور ڈاکو راج کے خاتمے کے لیے جدوجہد جاری رہے گی۔ ان خیالات کا اظہار انہوں نے جیکب آباد کے مقامی رہنما محمد عمر سہاگ کی وفات کے بعد میڈیا سے گفتگو کرتے ہوئے کیا۔ اس موقع پر سندھ کے سیکرٹری اطلاعات مجاہد چنا، مقامی رہنما ہدایت اللہ رند، عبدالغنی پیرزادہ، مرحوم کے بیٹے شعیب احمد، زاہدحسین سہاگ اور داماد محمد یعقوب جکھرانی بھی موجود تھے۔